ქურთულმა დაჯგუფებებმა სირიის მთავრობასთან შეთანხმება დადეს. შეთანხმების თანახმად, სირია-თურქეთის საზღვარზე სირიის სამთავრობო ჯარები განლაგდება, რათა ქურთებმა თურქეთის თავდასხმის მოგერიება შეძლონ.

როგორც ცნობილია, სირიის სამხედროები ჩრდილოეთისკენ უკვე მიემართებიან. მანამდე აშშ-მ განაცხადა, რომ აღნიშნული ტერიტორიიდან დარჩენილ სამხედროებს გაიყვანს.

9 ოქტომბერს თურქეთმა სირიის ტერიტორიაზე სამხედრო მოქმედებები სირიელი ქურთების წინააღმდეგ დაიწყო. თურქეთის ხელისუფლება ამ ოპერაციას "მშვიდობის წყაროს" უწოდებს და მათი მიზანია სირიის საზღვარზე ქურთებისგან და ე.წ. ისლამური სახელმწიფოსგან თავისუფალი ზონა შეიქმნას. როგორც ოფიციალური ანკარა აცხადებს, ამით 1-2 მილიონი სირიელი ლტოლვილი თავის საცხოვრებელს დაუბრუნდება.

თურქეთი ქურთულ დაჯგუფებებს ტერორისტულ უწოდებს. ამავე დროს, ქურთები ე.წ. ისლამურ სახელმწიფოსთან ბრძოლაში აშშ-ს მთავარი მოკავშირეა.

სამხედრო თავდასხმაში მონაწილეობს ავიაცია, არტილერია და სხვადასხვა სამხედრო დანაყოფი. თავდასხმა ქურთების მიერ კონტროლირებად ოთხ ძირითად ქალაქზე დაიწყო, რის გამოც ათასობით ადამიანმა საკუთარ საცხოვრებელი დატოვა. დაღუპულებს შორის არიან როგორც ქურთი მებრძოლები, ისე მშვიდობიანი მოსახლეობა.

თავდასხმის გამო საერთაშორისო საზოგადოებამ თურქეთი გააკრიტიკა. მიუხედავად იმისა, რომ აშშ-მ ტერიტორიიდან ჯარები გაიყვანა პრეზიდენტმა, დონალდ ტრამპმა განაცხადა, რომ ვაშინგტონი თურქეთის ქმედებებს არ ამართლებს და სერიოზული სანქციების გატარებით იმუქრება. გარდა ამისა, ოპერაციის დაწყებამდე აშშ-მ რეგიონიდან საკუთარი სამხედროები გამოიყვანა.

გაეროს გენერალურმა მდივანმა, ანტიონიო გუტიერეშმა შეშფოთება გამოთქვა მიმდინარე სიტუაციის გამო, ხოლო ფედერიკა მოგერინიმ თურქეთისგან საომარი მოქმედებების შეწყვეტა მოითხოვა.