ქართული კინოს წარმატებებზე საერთაშორისო გამოცემები სულ უფრო ხშირად და უფრო პოზიტიურ სტატიებს წერენ. ამბობენ რომ ჩვენს ეროვნულ კინემატოგრაფს მეორე სუნთქვა გაეხსნა და მიუხედავად იმისა, რომ ხშირად სიუჟეტური ხაზი კვლავ აფხაზეთის ომის თემატიკის გარშემო ტრიალებს, მაინც მომრავლდა სოციალური დრამები. მაგალითისთვის შეგვიძლია ორი არაჩვეულებრივი ქართველი რეჟისორის ფილმები გამოვყოთ - ნანა ექვთიმიშვილის გრძელი ნათელი დღეები და რუსუდან ჭყონიას გაიღიმეთ. ასევე აღსანიშნავია ნინო ბასილაიას ფილმი ანას ცხოვრება და ლევან კოღუაშვილის შემთხვევითი პაემნები. 2017 ქართული კინოსთვის მნიშვნელოვანი და საინტერესო წელი იქნება, რადგან ეკრანზე რამდენიმე საინტერესო სურათი გამოდის.

ჩემი ბედნიერი ოჯახი

ფოტო: My Happy Family / ჩემი ბედნიერი ოჯახი

რა რეაქცია გექნებათ თუკი გაიგებთ, რომ ერთ დღეს თქვენი 50 წელს გადაცილებული მეზობელი ქალი, ნაცნობი, ნათესავი, დედა ან მეუღლე, რომელმაც მთელი თავისი სიცოცხლე ოჯახზე ზრუნვას დაუთმო, გადაწყვეტს ცხოვრება ახლიდან, სრულიად მარტომ დაიწყოს. ფილმ გრძელი ნათელი დღეების შემდეგ, რომელიც ასზე მეტ კინოფესტივალზე აჩვენეს, მსოფლიოს რამდენიმე ქვეყნის კინოგაქირავებაში მოხვდა და 2013 წლის ყველაზე წარმატებულ საფესტივალო ფილმადაც დასახელდა, ჩემი ბედნიერი ოჯახი ნანა ექვთიმიშვილისა და სიმონ გროსისთვის მეორე ერთობლივი ფილმია.

სიუჟეტი თბილისში მცხოვრები ერთი ქართული ოჯახის გარშემო ვითარდება, სადაც სამი თაობის წარმომადგენლები ერთ ჭერქვეშ ცხოვრობენ. ხშირად ამბობენ, რომ ნანა ექვთიმიშვილის ფილმების ერთ-ერთი მთავარი მახასიათებელი მის მიერ შექმნილი ქალი პერსონაჟებია, ახალი კინოსურათის სიუჟეტიც ქართული ენისა და ლიტერატურის პედაგოგის მანანა მხეიძის გარშემო ვითარდება, რომელიც ერთ დღეს საკუთარი ცხოვრების შეცვლას მოინდომებს. ჩემი ბედნიერი ოჯახი საქართველოს, გერმანიისა და საფრანგეთის ერთობლივი კინოპროდუქციაა, რომელიც საქართველოს კინემატოგრაფიის ეროვნული ცენტრისა და კინემატოგრაფიის ევროპული ფონდის ევრიმაჟის ხელშეწყობით იქმნება. ფილმის გადაღებაში საკუთარი წვლილი შეაქვს კინოინდუსტრიის წახალისების სახელმწიფო პროგრამას გადაიღე საქართველოში.

ფილმში მთავარ როლებს ია შუღლიაშვილ, მერაბ ნინიძე და ბერტა ხაფავა ასრულებენ.
ფილმის პრემიერა ქართველი და საერთაშორისო მაყურებლისთვის 2017 წელს შედგება.

საიდუმლო

ფოტო: საიდუმლო/ზაზა ურუშაძის ფილმი

ოსკარის ნომინანტი რეჟისორი ზაზა ურუშაძე წელიწადნახევრის შემდეგ გადასაღებ მოედანს დაუბრუნდა და ახალ დრამაზე სახელწოდებით საიდუმლო მუშაობს. როგორც რეჟისორი ამბობს ფილმი მიტევებაზეა და ის მის წინამორბედ არც ერთ ნამუშევარს არ ჰგავს. ფილმში სიუჟეტი ბერის ირგვლივ ვითარდება, რომელსაც ერთ-ერთ სოფელში ეკლესიის წინამძღვრად ანაწილებენ. ბერის როლს მსახიობი დიმიტრი ტატიშვილი ასრულებს.

ფოტო: საიდუმლო/ზაზა ურუშაძის ფილ

ფილმში მონაწილეობს ნატა მურვანიძე, რომელიც მესანთლე ასმათის როლს ასრულებს.

ხიბულა

ფოტო: ირაკლი გედენიძის ფოტო

რეჟისორი გიორგი ოვაშვილი, გაღმა ნაპირის შემდეგ უკვე ახალ ფილმზე სახელად ხიბულა მუშაობს. სიუჟეტი საქართველოს ყოფილ პრეზიდენტის ზვიად გამსახურდიას გარშემო ვითარდება და პირველი პრეზიდენტის უკანასკნელი 50 დღის ამსახველი დრამა იქნება.

ოვაშვილს ფილმის გადაღება ჯერ კიდევ 10 წლის წინ სურდა. თუმცა ფიქრობდა, რომ ამ თემისგან დისტანცირება უნდა მოეხდინა, რათა საბოლოოდ მოეხერხებინა მაქსიმალური მიუკერძოებელი ყოფილიყო. რეჟისორი ამბობს, რომ ეს არ იქნება ამბავი ისტორიულ ფიგურაზე, ეს იქნება ამბავი ადამიანურ მარტოობასა და ძალაუფლების დაკარგვაზე.


მძევლები

ფოტო: რეზო გიგინეიშვილი/მძევლები

რეზო გიგინეიშვილი თვთმფრინავის ბიჭების ისტორიას კინოში გააცოცხლებს. რეჟისორის ახალი ფილმი რეალურ ამბავზეა დაფუძნებული და ის 1983 წელს ქართველი ახალგაზრდების მიერ თვითმფრინავის გატაცების მცდელობას ეხება. მაშინ ახალგაზრდებს თავისუფლების მოპოვება და საბჭოთა კავშირისგან თავის დაღწევა სურდათ.

რა თქმა უნდა, ეს სრული ჩამონათვალი არ არის იმ ქართული ფილმებისა, რომელიც ეკრანზე შემდეგ წელს გამოვა, მაგალითად 2017-ში ვიხილავთ ლევან კოღუაშვილის მეოთხე ბრაიტონი, რომელზეც სამწუხაროდ ჯერ-ჯერობით ინფორმაციას არ ასაჯაროებენ, შემდეგ წელს გამოვა რამდენიმე ქართული ანიმაციური ფილმიც.