რამდენიმე დღეში ოთხი თვე გავა მას შემდეგ, რაც თბილისში აქციის დაშლის დროს რამდენიმე ათეული ადამიანი რეზინის ტყვიებით დაშავდა და ცრემლსადენმა გაზმა მოწამლა. ამ დღეს აქციის ორმა მონაწილემ თვალი დაკარგა.

შინაგან საქმეთა სამინისტრო, თითქმის ოთხი თვის გასვლის მიუხედავად, კვლავ მალავს რამდენი რეზინის ტყვია და ცრემლსადენი გაზი გამოიყენა პარლამენტის შენობასთან შეკრებილი მოქალაქეების დასაშლელად. ამ საქმეზე ინფორმაციის მისაღებად On.ge-ს მიერ მომზადებული სარჩელი თბილისის საქალაქო სასამართლომ წარმოებაში მიიღო და მოსამზადებელი სხდომა ჩანიშნა.

On.ge-მ თბილისის საქალაქო სასამართლოს 2019 წლის 14 აგვისტოს მიმართა. ამ დღეს შინაგან საქმეთა სამინისტროდან ინფორმაციის მიღებისთვის საჭირო ყველა ვადა უკვე ამოწურული იყო, თუმცა საჯარო ინფორმაციის გაცემაზე პასუხისმგებელი პირი ისე გავიდა შვებულებაში, რომ მედიასაშუალებას რამე სახის პასუხი არ აცნობა.

On.ge-ს სასამართლო დავის წარმოებაში საქართველოს ახალგაზრდა იურისტთა ასოციაცია ეხმარება.