გირჩის ერთ-ერთი ლიდერის, ვახტანგ მეგრელიშვილის თქმით, ერთი თვის განმავლობაში მის ნაცვლად, შეცდომით მის ცოლს უსმენდნენ.

დღეს, 2 ოქტომბერს გირჩის რამდენიმე ლიდერი პოლიციის სამმართველოში იყო დაბარებული. მათ განუცხადეს, რომ 2018 წელს კანაფის ლეგალიზების ფესტივალის ჩატარებული საქმეზე ერთი თვის განმავლობაში ფარულად უსმენდნენ.

როგორც ვახტანგ მეგრელიშვილმა On.ge-ს უთხრა, საბუთების გაცნობისას მან წაიკითხა ნომერი, რომელიც მას არ ეკუთვნოდა. მან ადგილზე იკითხა, რატომ უსმენდნენ მისი ცოლის ნომერს მის ნაცვლად, რაზეც პასუხი ვერ მიიღო.

გირჩის წევრები, მათ შორის ვახტანგ მეგრელიშვილი და იაგო ხვიჩია, პოლიციის სამმართველოში დღეს, 2 ოქტომბერს დაიბარეს. პარტიაში აცხადებენ, რომ შსს-მ ოფიციალურ მიზეზად კანაფის ლეგალიზაციის ფესტივალის საქმის დახურვა დაუსახელა. გირჩის წევრების აზრით, პოლიციაში დაბარებით ძალოვან სტრუქტურებს მათი დაშინება უნდათ. პარტიის ლიდერი, ზურაბ ჯაფარიძე ამ ფაქტს ტაქსების რეგულაციის გაპროტესტებას უკავშირებენ.

სამმართველოდან გამოსვლის შემდეგ იაგო ხვიჩიამ განაცხადა, რომ სამართალდამცავი უწყებები მათ სატელეფონო საუბარს ერთი თვის განმავლობაში უსმენდნენ, თუმცა არაკანონიერი ვერაფერი აღმოაჩინეს.