ცენტრალურ საარჩევნო კომისიაში On.ge-ს განუცხადეს, რომ მათ ბაზებში მონაცემები ოპერატორებს ამ წუთებშიც შეჰყავთ, ეს მონაცემები კი ყოველ წამს შეიძლება შეიცვალოს და სწორედ ამიტომ, ვერ გვეუბნებიან, პატრიოტთა ალიანსს ხმების 4,99% აქვს თუ 5%.

ცენტრალური საარჩევნო კომისიის ვებგვერდზე გვიან ღამით განახლდა საპარლამენტო არჩევნების ხმების დათვლის შედეგები უბნების 99,92%–ის დათვლის საფუძველზე. შედეგების დიაგრამაზე განახლებული მონაცემების მიხედვით, პატრიოტთა ალიანმა მიიღო ხმების 5%. ბოლო საათების განმავლობაში მათი მონაცემი იყო 4,99%, რაც არ იყო საკმარისი პარლამენტში შესასვლელად.

თუმცა, იმავე ცესკოს საიტზე წერია, რომ პატრიოტთა ალიანსმა, რომელიც არჩევნებზე მე–8 ნომრად იყრიდა კენჭს, მიიღო 88 032 ხმა. იქვე მითითებულია, რომ ეს არის ხმების 5%. რეალურად, ეს რიცხვი არ არის მიმდინარე მომენტისთვის დამუშავებული 1 762 975 ხმის 5 პროცენტი. მარტივი გამოთვლით მიიღება, რომ 88 032 ხმა დამუშავებული 1 762 975 ხმის 4,9933 პროცენტია და არა 5%, როგორც ეს ჩანს ცესკოს შედეგების დიაგრამაზე.

ცესკოს მონაცემებში ეჭვის შეტანის საფუძველი გახდა ის, რომ On.ge-ს ვებგვერდზე, სადაც მონაცემები ავტომატურად ახლდება თითოეული სუბიექტის მიერ მიღებული ხმების რაოდენობის საფუძველზე, პატრიოტთა ალიანსის მონაცემი კვლავ არის 4,99%. ეს მონაცემი კი საკმარისი არ არის პარლამენტში მოსახვედრად. ამ ბმულზე შეგიძლიათ იხილოთ Google Sheets დოკუმენტი, სადაც ცესკოს ვებგვერდზე და მის ბაზაში არსებული მონაცემებია დაკოპირებული. მწვანე უჯრებში სტანდარტული ფორმულით გადათვლილი პროცენტებია მოთავსებული.

On.ge დაუკავშირდა ცენტრალური საარჩევნო კომისიის სპიკერს, ანა მიქელაძეს, რომელსაც ვთხოვეთ განემარტა, რატომ განსხვავდება დიაგრამაზე ასახული მონაცემი პატრიოტთა ალიანსის მიერ მიღებული რეალური მონაცემისგან. ანა მიქელაძის განმარტებით, სხვადასხვა უბნებისა და ოლქებიდან მიღებულ მონაცემებს ცესკოს ოპერატორები ამუშავებენ და შეჰყავთ ბაზაში, ერთ ოქმს ამოწმებს ორი ადამიანი, რათა ადამიანური ფაქტორი გამოირიცხოს. პროგრამა ამ წუთებშიც გახსნილია და მისი განახლება მიმდინარეობს და შეიძლება, ახლა რაღაც არასწორად ჩანს, მაგრამ საბოლოო შედეგები იქნება ზუსტი.

თუმცა, როგორც ცესკოს პრესსპიკერი ამბობს, ამ წუთას ვერ იტყვიან დაზუსტებით, პატრიოტთა ალიანსმა მიიღო ხმების 4,99% თუ 5%.

აღნიშნული მონაცემი მნიშვნელოვანია, რადგან სწორედ ამაზეა დამოკიდებული, პატრიოტთა ალიანსი მოხვდება თუ არა პარლამენტში, რადგან საკანონმდებლო ორგანოში შესასვლელად ხმების 5% არის საჭირო.