5-6 ოქტომბერს DevOps Con Tbilisi 2019 ტექნოლოგიურ კონფერენციას ილიას სახელმწიფო უნივერსიტეტი უმასპინძლებს. DevOps Georgia-ს გუნდი მეორედ მართავს ამ ღონისძიებას და წელს მისი გენერალური სპონსორები არიან საქართველოს ბანკის "ღია ბანკინგის" განვითარების პროგრამა BOG Fintech და პროგრამული უზრუნველყოფის მწარმოებელი კომპანია ომედია.

რა არის DevOps?

DevOps IT პროექტების მართვისა და საბოლოო პროდუქტის ავტომატიზირებულად მიწოდებაზე ორიენტირებული ტექნოლოგიებისა და მიდგომების ერთობლიობაა, რაც დეველოპერებს საშუალებას აძლევს სწრაფად შექმნან და დახვეწონ სხვადასხვა აპლიკაციები. სწორედ DevOps ტექნოლოგიები აჩქარებს ყოველდღიურად ახალი პროგრამების გაჩენას, უკვე არსებული პროგრამული უზრუნველყოფების დახვეწასა და ახალი ფუნქციონალით გამდიდრებას.

რას გვთავაზობს DevOps Con Tbilisi 2019?

კონფერენცია ქმნის ერთიან პლატფორმას, სადაც IT სფეროს სპეციალისტებს ეძლევათ საშუალება ისაუბრონ და სტუმრებს გაუზიარონ თავიანთი პრაქტიკული თუ თეორიული გამოცდილება DevOps, DataOps თუ SecOps მიმართულებით. DevOps Con Tbilisi 2019 ერთიანებს პროგრამული უზრუნველყოფის ინჟინრებს, არქიტექტორებს, ტესტერებს, სისტემურ და ქსელის ადმინისტრატორებს, ინფრასტრუქტურის მმართველებს, სისტემურ ინტეგრატორებს, კიბერ-უსაფრთხოების ოფიცრებს და ზოგადად ტექნოლოგიური სამყაროს წარმომადგენლებს, რომლებიც პროგრამულ პროდუქტებს ქმნიან და ნერგავენ. კონფერენციის ძირითადი თემებია: კუბერნეტისი, IaC (Infrastructure as Code), კიბერ-უსაფრთხოება ავტომატიზაციის პროცესში, DataOps და სხვა აქტუალური ტექნოლოგიური საკითხები. ჩვენი მიზანია, ასევე, ხელი შევუწყოთ OpenSource ინიციატივას საქართველოში, რათა მეტად განვითარდეს ღია კოდის წერისა და გაზიარების კულტურა.

რა არის საჭირო კონფერენციაზე დასასწრებად?

DevOps Con Tbilisi 2019-ზე დასწრება თავისუფალია და მასზე მოსახვედრად მხოლოდ მარტივი სარეგისტრაციო ფორმის შევსებაა საჭირო. სარეგისტრაციო ფორმა შეგიძლიათ იხილოთ კონფერენციის ვებ-გვერდზე.

დამატებითი ინფორმაციისთვის:

DevOps Con Tbilisi 2019-თან დაკავშირებული დეტალური ინფორმაცია, მათ შორის კონფერენციის პროგრამა და ინფორმაცია მომხსენებლების შესახებ შეგიძლიათ იხილოთ ვებ-გვერდზე — devopsgeorgia.ge.