"არ მგონია, რომ მანდატის შეწყვეტაზე უნდა ვისაუბროთ", — ასე გამოეხმაურა ქართული ოცნების დეპუტატი, გია ვოლსკი მისი თანაგუნდელების მოსაზრებას, რომ ვანო ზარდიაშვილთან კონფლიქტის შემდეგ ეკა ბესელიამ მანდატი უნდა დატოვოს.

"ძალიან ადვილია მდგომარეობიდან გამოსვლა, ემოციაზე აყოლა და ეს, მგონია, ჩვენს საზოგადოებას არ უხდება და დეპუტატების მხრიდან უფრო მეტი მოთმინება უნდა იყოს ერთმანეთის მიმართ. მით უმეტეს, შეურაცხმყოფელი სიტყვები ჩვენი ყოველდღიური ნაწილი გახდა. შეიძლება, მხოლოდ საქართველოს არ ახასიათებს, მაგრამ ჩვენთვის დამაზიანებელია. სამწუხაროდ, აქ საპარლამენტო ცხოვრება ასეთი დაპირისპირებების ფონზე მიმდინარეობს", — განაცხადა ვოლსკიმ ჟურნალისტებთან.

26 სექტემბერს პარლამენტში, სადაც უზენაესის მოსამართლეობის კანდიდატს უსმენდნენ, ეკა ბესელიასა და ვანო ზარდიაშვილს შორის კონფლიქტი მოხდა. ზარდიაშვილმა მოსამართლეების მოსმენის დროს ახსენა სიტყვები "ბესელიას მორალი", რის გამოც ბესელია ყოფილ თანაგუნდელს ხელით შეეხო. ბესელია ამბობს, რომ საბოდიშო არაფერი აქვს.

"ამ არარაობასთან არაფერი საქმე არა მაქვს. მას, რა თქმა უნდა, თავი არ უნდა გაუყადრო ადამიანმა, მაგრამ არც იმას არ ვაპირებ, ის შეურაცხყოფები რაც მესმოდა, უკაცრავად ამ სიტყვისთვის, გავატარო", — განაცხადა ბესელიამ.

დაპირისპირების შემდეგ უმრავლესობის დეპუტატები, დავით მათიკაშვილი და რატი იონათამიშვილი ბესელიას მოუწოდებდნენ, რომ დეპუტატის მანდატი დაეტოვებინა.

ამავე თემაზე: