"ის სილა მასაც და კოლექტიურად ყველას ეკუთვნოდა, ვინც ამ უმსგავსობაში და ამ მორალურ ტერორშია ჩართული ამდენი ხნის განმავლობაში", — განაცხადა დამოუკიდებელმა დეპუტატმა, ეკა ბესელიამ გადაცემა რეაქციის ეთერში. ასე გამოეხმაურა დეპუტატი ქართული ოცნების წევრისთვის სახეში სილის გარტყმას.

წამყვანის, ინგა გრიგოლიას კითხვაზე, ეკუთვნოდა თუ არა ეს სილა ბიძინა ივანიშვილსაც, დეპუტატი პასუხობს:

"ყველას ერთად. მისი სახითაც, მასაც ეკუთვნოდა ეს სილა".

ბესელიას თქმით, არაერთხელ უთხრა ივანიშვილს, რომ გაეჩერებინა "კორუმპირებული და ყველაფერზე წამსვლელი" ადამიანი.

დღეს, 26 სექტემბერს პარლამენტში, სადაც უზენაესის მოსამართლეობის კანდიდატს უსმენდნენ, ეკა ბესელიასა და ვანო ზარდიაშვილს შორის კონფლიქტი მოხდა. ზარდიაშვილმა მოსამართლეების მოსმენის დროს ახსენა სიტყვები "ბესელიას მორალი", რის გამოც ბესელია ყოფილ თანაგუნდელს ხელით შეეხო.

ბესელია ამბობს, რომ საბოდიშო არაფერი აქვს. ის აფრთხილებს ყველას, რომ მსგავსი ქცევის შემთხვევაში, იგივე პასუხს მიიღებენ.

"ამ არარაობასთან არაფერი საქმე არა მაქვს. მას, რა თქმა უნდა, თავი არ უნდა გაუყადრო ადამიანმა, მაგრამ არც იმას არ ვაპირებ, ის შეურაცხყოფები რაც მესმოდა, უკაცრავად ამ სიტყვისთვის, გავატარო", — განაცხადა ბესელიამ.

ამავე თემაზე: