მთავარი არხის 2,5-პროცენტიანი წილი ნაციონალური მოძრაობის ყოფილი ლიდერის, ნიკა რურუას ძმამ, გიორგი რურუამ იყიდა. არხის წილი კახაბერ ანჯაფარიძემ 2 500 ლარად გაიყიდა. ინფორმაცია ამის შესახებ თავდაპირველად რადიო თავისუფლებამ გაავრცელა.

შეთანხმების მიხედვით, რურუამ წილის მიღების სანაცვლოდ ერთი დღის ვადაში 250 ათასი დოლარის ინვესტიცია უნდა განახორციელოს. ცვლილებები რეესტრში უკვე აისახა.

ცვლილებების შემდეგ არხის საკონტროლო პაკეტი კვლავ რჩება ნიკა გვარამიას (51%). მასთან ერთად ტელევიზიის წილები ეკუთვნით კახაბერ ანჯაფარიძესა (46,5%) და გიორგი რურუას (2,5%).

მთავარი არხი რუსთავი 2-დან გათავისუფლებული დირექტორის, ნიკა გვარამიას დაარსებული ტელევიზიაა, სადაც ამავე არხიდან გამოშვებული და წამოსული ჟურნალისტები მუშაობენ.

ნიკა გვარამიამ ახალი არხის დაფუძნება მას შემდეგ დააანონსა, რაც რუსთავი 2-ის ახალმა მფლობელმა, ქიბარ ხალვაშმა ის გენერალური დირექტორის თანამდებობიდან გაათავისუფლა.

ქიბარ ხალვაშის მიერ რუსთავის 2-ის გადაფორმებიდან ერთი თვის თავზე არხიდან გაათავისუფლეს საინფორმაციო სამსახურის უფროსი, ნოდარ მელაძე, საზოგადოებრივი და პოლიტიკური ტოქ-შოუს მთავარი პროდიუსერი, გიორგი ლაფერაშვილი; პოლიტიკური გადაცემების წამყვანები, გიორგი გაბუნია და ეკა კვესიტაძე და გასართობი გადაცემის ავტორი და წამყვანი, ნანუკა ჟორჟოლიანი.

ამ გადაწყვეტილების შემდეგ რუსთავი 2 პირდაპირ ეთერში დატოვეს კურიერის წამყვანებმა, დიანა ჯოჯუამ და მიშა სესიაშვილმა. 21 აგვისტოს ტელეკომპანია თითქმის სრული შემადგენლობით დატოვეს ჟურნალისტებმა. არხი დატოვა რამდენიმე პროდიუსერმა, გადაცემების შაბათის შუადღის და კვირის სხვა შუადღის წამყვანებმა. ტელევიზია, ასევე, დატოვეს P.S.-ის გუნდმა, რეგიონის ჟურნალისტებმა და გადაცემა დილა მშვიდობისა საქართველოს ნაწილმა. გარდა ამისა, რუსთავი 2 დატოვა ვანო ჯავახიშვილმა, თამუნა ლეკვეიშვილმა, თათია სულუაშვილმა, ვასო ფხაკაძემ და კომედი ჯგუფის რამდენიმე მსახიობმა.