მედიის განვითარების ფონდის ახალი კვლევის თანახმად, 2018 წელს სიძულვილის ენის გამოყენებაში პატრიოტთა ალიანსი ლიდერობს. MDF-ის ეს კვლევა მოიცავს 2018 წლის პირველი იანვრიდან 31 დეკემბრის ჩათვლით პერიოდს.

კვლევის მიხედვით, პატრიოტთა ალიანსის წევრებმა 2018 წელს ჯამში 157 სიძულვილის ენის შემცველი განცხადება გააკეთეს, მას მოსდევს ქართული დასი (41) და თავისუფალი საქართველო (40). ამავე კვლევის მიხედვით, ქართული ოცნების წარმომადგენლებმა 2018 წელს 27, ხოლო ოპოზიციური პარტიის, ნაციონალური მოძრაობის წევრებმა 11 დისკრიმინაციული კომენტარი გააკეთეს. გარდა ამისა, სიძულვილის ენის შემცველი 26 განცხადება გააკეთა პარტიამ დემოკრატიული მოძრაობა ერთიანი საქართველოსთვის, 8 ლეიბორისტულმა პარტიამ, 6 კი პარტიამ ნეიტრალური სოციალისტური საქართველო.

ფოტო: MDF

კვლევის თანახმად, პატრიოტთა ალიანსის 157 დისკრიმინაციული კომენტარიდან 55 იყო ქსენოფობია, 49 — თურქოფობია, 25 — ჰომოფობია, 8 — რელიგიური ნიშნით დისკრიმინაცია, 15 — ისლამოჰობია, 4 — სიძულვილის ენა და 1 — რასიზმი.

ფოტო: MDF

მაგალითად, 4 აპრილს ტელეკომპანია ობიექტივის გადაცემა ღამის სტუდიაში პატრიოტთა ალიანსის წევრმა, გიორგი ლომიამ ასეთი შინაარსის ქსენოფობიური კომენტარი გააკეთა:

"სირიიდან შემოდიან ხო ანუ, არაბული ქვეყნებიდან შემოდიან, როდესაც შემოდის რაღაც ლტოლვილთა ნაკადი, მინიმუმ ალბათ 15-20 პროცენტი ეს არის ის ტერორისტული ორგანიზაციების… წარმომადგენლები... თქვენ [ევროპას] გინდათ რომ აიცილოთ ეს საფრთხე და ჩვენ ამ საფრთხის წინაშე უნდა აღმოვჩნდეთ".

პატრიოტთა ალიანსის ლიდერი, ირმა ინაშვილის თურქოფობიული განცხადება იმედის ეთერში, რომელიც 20 თებერვალს გააკეთა:

"მე საერთოდ მეჩვენება, რომ რუსეთის თემა არი უბრალოდ ძალიან გაცვეთილი თემა, ძალიან კომიკური თემა უკვე… ტერიტორიები ოკუპირებული აქ თურქეთს 33 პროცენტი ჩვენი, აღიარეთ, რო ოკუპანტია თურქეთი, რისი გეშინიათ?... ასევე ჩვენ ვიცით, რომ რუსეთის მიერ ოკუპირებულია ჩვენი მიწები".

კვლევის მიხედვით, პატრიოტთა ალიანსი გამოირჩევა ჰომოფობიური განცხადებებითაც, ერთ-ერთი დისკრიმინაციული განცხადება ირმა ინაშვილმა მარშალპრესთან 16 მაისს გააკეთა:

"გამოდის ისე, რომ უმცირესობის უმცირესობა ყოველთვის ჩაგრავს უმრავლესობას... უმრავლესობა უკვე შეურაცხყოფილია მუდმივი საუბრით ნარკოტიკების ლეგალიზაციაზე, ლგბტ თემის წარმომადგენლების მუდმივ აქციებზე. მე ლგბტ თემის არსებობას არ ვებრძვი, იყვნენ, იარსებონ, ეს მათი საქმეა. მე ვარ პროპაგანდის წინააღმდეგი. პროპაგანდას ვეძახი იმას, რომ ხდება ზეწოლა ჩვენზე, რომ "თუ არ ხარ ჩვენთან, ბნელი ხარ".

ისევ მარშალპრესთან, 2 ატვისტოს ირმა ინაშვილმა კათოლიკური ეკლესიის მიმართ დისკრიმინაციული განცხადება გააკეთა:

"კათოლიკური ეკლესია ჩვენთან სტუმარია, რომელსაც არც არავინ ავიწროვებს, არც არავინ ებრძვის, არც ვინმე უშლის ხელს, მაგრამ ეს სტუმარი, ჯუზეპე პაზოტოს სახით, მართლმადიდებლურ ეკლესიას საკონსტიტუციო სასამართლოში უჩივის და თხოვს იგივე უფლებებს, რაც მართლმადიდებლურ ეკლესიას აქვს. პატივისცემით შეგახსენებთ, რომ კათოლიკეები საქართველში მოსახლეობის 0,5 პროცენტია... საინტერესოა, რომ ამ უზნეობაში, კათოლიკური ეკლესიის გარდა, მისი კიდევ 7 თანამებრძოლი მონაწილეობს".