შალვა პაპუაშვილი მეორედ აკრიტიკებს გერმანიის საგარეო საქმეთა სამინისტროს იმის გამო, რომ მეორე წელია მათ ვებგვერდზე საქართველოს პრეზიდენტად კვლავ სალომე ზურაბიშვილია მითითებული და საგარეო საქმეთა მინისტრად ილია დარჩიაშვილი. მისი თქმით, "გერმანიის ხელისუფლება მატრაკვეცობას უნდა მოეშვას".

"მატრაკვეცობას უნდა მოეშვან. გერმანიის ხელისუფლება რომ ასე თავს ასაგდებად იხდის და საკუთარ თავს დასაცინად იხდის ასეთი სამარცხვინო, სასაცილო თავის მართლებებით, ხომ უნდა მიხვდნენ, რა დამართეს საკუთარი ქვეყნის რეპუტაციას ასეთი ქცევით. ასე ელაპარაკონ საკუთარ ელჩს და ერთმანეთთან ილაპარაკონ ასეთი უპატივცემულო ტონით, თუკი ჰგონიათ, რომ აქ ვინმეს ნაცარს შეაყრიან თვალში, რომ ერთი "აიტიშნიკი'" ვერ მოძებნეს, რომ სახელი და გვარი ჩაესწორებინათ საიტზე? მერე იმას გვედავებიან ხოლმე, რომ ფული გვაქვს დასახარჯი, თქვენ უნდა დაგეხმაროთ ქვეყნის განვითარებაშიო, საკუთარ ვებგვერდს მიხედონ ჯერ და მერე ელაპარაკონ ქართველ ხალხს", — განაცხადა პაპუაშვილმა.

ეს არ არის პირველი შემთხვევა, როცა შალვა პაპუაშვილმა გერმანია საგარეო საქმეთა სამინისტროს ვებგვერდზე არსებული ხარვეზისთვის გააკრიტიკა. მიმდინარე წლის 13 თებერვალს, ბრიფინგზე თქვა, რომ "ეს არ არის რომელიმე ვებ-ადმინისტრატორის ხარვეზი. შეუძლია გერმანიის ელჩს, რომ შეასწოროს".

ამავე თემაზე გააკრიტიკა გერმანიის საგარეო საქმეთა სამინისტრო 15 აპრილს საგარეო უწყების ხელმძღვანელმა, მაკა ბოჭორიშვილმაც. მისი თქმით, ამას "ვერ მიიღებენ, როგორც ტექნიკურ ხარვეზს. არ არის ძალიან რთული ორი გვარის ჩასწორება".