ახალგაზრდა იურისტთა ასოციაციის თავმჯდომარე თამარ ონიანი სოციალურ ქსელში 2024 წლის დეკემბრის აქციების დროს დაკავებული 11 პირის მიმართ გამოტანილ თბილისის სააპელაციო სასამართლოს გადაწყვეტილებას გამოეხმაურა და განმარტა, თუ რატომ ვერ აკმაყოფილებს მიღებული გადაწყვეტილებები გამამტყუნებელი განაჩენის გამოსატანად აუცილებელ გონივრულ ეჭვს მიღმა სტანდარტს.

მისი თქმით, 11 პირის მიმართ გამოტანილი გამამტყუნებელი განაჩენი (რომელიც სააპელაციომ ძალაში დატოვა) "პოლიტიკურად მოტივირებული სისხლისსამართლებრივი დევნის კლასიკური მაგალითია". ამ საქმეების რეალური მიზანია არა კანონის აღსრულება, არამედ განსხვავებული აზრისა და პროტესტის დასჯაა.

"პოლიტიკურად მოტივირებულ საქმეებს შორის ერთ-ერთია 2024 წლის დეკემბერის აქციების დროს დაკავებული 11 პირის საქმე, რომელზეც დღეს სააპელაციო სასამართლომ განაჩენის ძალაში დატოვების გადაწყვეტილება მიიღო.

ამ საქმეთა პრედომინანტური მიზანი განსხვავებული აზრის დასჯაა და ისინი პოლიტიკურად მოტივირებული სისხლისსამართლებრივი დევნის კლასიკური მაგალითია.

საიას მონიტორინგის შედეგების მიხედვით (რომელიც სხვა 58 პირის საქმესთან ერთად, ამ საქმესაც მოიცავს), შეფასებულია, რომ არაერთ საქმეში სისხლისსამართლებრივი დევნა ვერ აკმაყოფილებდა "დასაბუთებული ვარაუდის" სტანდარტს, ხოლო სადაც ფორმალურად დაკმაყოფილებულად შეიძლება ჩათვლილიყო, პროკურატურამ ვერ უზრუნველყო მოქმედი სახელმძღვანელო პრინციპების სრულად დაცვა, მათ შორის — დევნის საჯარო ინტერესის სწორი შეფასება და კონსტიტუციით დაცულ გამოხატვის თავისუფლებასა და პოლიტიკური ანგარიშსწორების მიზნებით სისხლის სამართლის მექანიზმების გამოყენებას შორის ზღვარის დაცვა. რიგ საქმეებში მტკიცებულებათა ერთობლიობა ვერ აღწევდა "გონივრულ ეჭვს მიღმა" სტანდარტს, რაც, შერჩევითი მართლმსაჯულების ნიშნებთან ერთად, ცხადყოფს, როგორც სასამართლოს დამოუკიდებლობის მწვავე დეფიციტს, ისე პროფესიული კომპეტენციის სერიოზულ გამოწვევებს.

სასამართლოს მიერ მიღებულ საბოლოო გადაწყვეტილებებში არ იყო მტკიცებულებათა იმგვარი ერთობლიობა, რომელიც ობიექტურ პირს დაარწმუნებდა პირის ბრალეულობაში, რაც იმაზე მიუთითებს, რომ მიღებული გადაწყვეტილებები ვერ აკმაყოფილებდა გამამტყუნებელი განაჩენის გამოსატანად აუცილებელ გონივრულ ეჭვს მიღმა სტანდარტს.", — წერს თამარ ონიანი სოციალურ ქსელში.