რუსეთში დააკავეს იაკუტელი შამანი, ალექსანდრ გაბიშევი, რომელიც მოსკოვში "პუტინის განსადევნად "ფეხით მიდიოდა. BBC-ის ინფორმაციით, თვითმხილველები ყვებიან, რომ პოლიცია ორი ავტობუსით მოვიდა და შამანი თავისი ურიკით წაიყვანა. ზოგიერთი კი ამბობს, რომ შამანი უცნობმა ადამიანებმა მოიტაცეს.

ბურიატეთის პოლიციაში BBC-ის დაუდასტურეს ერთი პირის დაკავება, თუმცა ვინაობა არ გაუმხილეს. პოლიციის თქმით, დაკავებული კაცი იაკუტიაში დანაშაულის ჩადენისთვის ძებნილია. გამოცემის ინფორმაციით, გაბიშევი ძებნილების სიაში არაა.

ალექსანდრ გაბიშევმა თავისი მსვლელობა მიმდინარე წლის მარტში დაიწყო და უკვე 2 800 კილომეტრზე მეტი გაიარა. 10 სექტემბერს ულან-უდეში დაპირისპირება იყო მოსახლეობასა და პოლიციას შორის მას შემდეგ, რაც გაბიშევის ორი მომხრე დააკავეს.