გერმანიის კანცლერი, ანგელა მერკელი გიორგი გახარიას საქართველოს პრემიერ-მინისტრის თანამდებობის დაკავებას ულოცავს. ამის შესახებ ინფორმაცია საქართველოს მთავრობის ადმინისტრაციამ გაავრცელა.

პრესრელიზში წერია, რომ კანცლერი მერკელი მილოცვაში ხაზს უსვამს ორი ქვეყნის ურთიერთობების განვითარების პოზიტიურ დინამიკას და მზადყოფნას გამოთქვამს, მომავალშიც დაუჭიროს მხარი საქართველოს შემდგომი განვითარების პროცესში:

"მიხარია, რომ ჩვენს ქვეყნებს შორის ურთიერთობები მუდმივად ვითარდება. ეს ეხება შედეგზე ორიენტირებულ თანამშრომლობას აღმოსავლეთ პარტნიორობის და ნატო-საქართველოს კომისიის ფარგლებში, ასევე ჩვენს მრავალფეროვან ორმხრივ ურთიერთობებს. გერმანია მზად არის, დაუჭიროს მხარი საქართველოს დემოკრატიული და სამართლებრივი სტრუქტურების შემდგომ განვითარებას. გისურვებთ წარმატებას და სიძლიერეს თქვენს საპასუხისმგებლო მისიაში".

გიორგი გახარიას გაპრემიერება აშშ-ს სახელმწიფო დეპარტამენტის ყოფილმა მაღალჩინოსნებმა, მეთიუ ბრაიზამ "დემონსტრაციებისთვის პროვოკაციულ ნაბიჯად" შეაფასა 20 ივნისის მოვლენების შემდეგ.

პარლამენტში მმართველმა პარტიამ ქართულმა ოცნებამ გიორგი გახარიას მთავრობა 8 სექტემბერს დაამტკიცა. გახარიას გაპრემიერებას კრიტიკულად შეხვდნენ ოპოზიცია და #სირცხვილიას სამოქალაქო აქტივისტები, რომლებიც თითქმის სამი თვეა შს მინისტრის პოსტიდან გახარიას გადადგომას ითხოვდნენ. ისინი დღეს უკვე მის დაწინაურებას აპროტესტებენ.

ნაციონალურმა მოძრაობამ და ევროპულმა საქართველომ კომიტეტებში გახარიას მთავრობის მოსმენას ბოიკოტი გამოუცხადეს და მხოლოდ ფრაქციის ფორმატში დაუსვეს კითხვები. გარდა ამისა, ოპოზიციას კენჭისყრაშიც არ მიუღია მონაწილეობა.