ქართული ოცნების დეპუტატი, სოფო კილაძე პოლიციელის მკვლელობაში მსჯავრდებულის შეწყალებას გამოეხმაურა და აღნიშნა, რომ კარგი იქნება თუ პრეზიდენტი კითხვებს პასუხს გასცემს.

"როდესაც ხდება ასეთი გადაწყვეტილების მიღება, იქ, ბუნებრივია, საზოგადოებას უჩნდება კითხვები იმიტომ, რომ საქმე გვაქვს პოლიციელის მკვლელობასთან, იმ პოლიციელის, რომელიც წარმოადგენს სახელმწიფოს სახეს. აქედან გამომდინარე ვფიქრობ, რომ კარგი იქნებოდა თუ პრეზიდენტი ამ კითხვებს პასუხს გასცემდა და თავად მოჰფენდა ნათელს, თუ რა არგუმენტების გათვალისწინებით მიიღო ეს გადაწყვეტილება", — განაცხადა დეპუტატმა.

პრეზიდენტმა სალომე ზურაბიშვილმა შეიწყალა კაცი, რომელმაც ბათუმში პოლიციელი თარაშ მუკბანიანი მოკლა. პოლიციელის მკვლელობისთვის რამაზ დევაძეს 2015 წლის 18 სექტემბერს 12 წლით პატიმრობა მიუსაჯეს.

პრეზიდენტის გადაწყვეტილებას კრიტიკით შეხვდნენ ოპოზიციის წარმომადგენლები. ამასთანავე, რამაზ დევაძის შეწყალება მიუღებელი აღმოჩნდა მმართველი პარტიის რამდენიმე დეპუტატისთვის. ევროპასთან ინტეგრაციის კომიტეტის თავმჯდომარის, თამარ ხულორდავას განცხადებით, პოლიციელის მკვლელობაში მსჯავრდებულის შეწყალება გაუგებარია. ხოლო ფრაქცია ქართული ოცნების თავმჯდომარემ, მამუკა მდინარაძემ პრეზიდენტის მიერ რამაზ დევაძის შეწყალებას მიუღებელი უწოდა.

თვითონ სალომე ზურაბიშვილმა გადაწყვეტილების განმარტებაზე უარი განაცხადა. მისი განცხადებით, შეწყალება პრეზიდენტის დისკრეციული უფლებაა.

"ეს უცებ გახდა რაღაც სალაპარაკო პრობლემა იმ დროს, როცა აქ ამდენი არის პოზიტივზე სალაპარაკო. ესეც დიდად არ მიკვირს. თუ რამე განცხადება არის უფრო დეტალური გასაკეთებელი, ეს უნდა გაკეთდეს თბილისში", — თქვა ზურაბიშვილმა.