TV პირველის შემდეგ მთავრობაში მოსალოდნელ საკადრო ცვლილებებზე ინტერპრესნიუსიც წერს. ორივე მედიასაშუალების ინფორმაციით, პრემიერ-მინისტრი შინაგან საქმეთა მინისტრი, გიორგი გახარია ხდება, მის ნაცვლად კი მმართველი პარტიის ერთ-ერთი ხელმძღვანელი პირი, ირაკლი ღარიბაშვილი ინიშნება.

პარტიის წევრმა, თამარ ხულორდავამ არ უარყო მოსალოდნელი ცვლილებების შესახებ გავრცელებული ინფორმაცია:

"ხვალ არის ძალიან მნიშვნელოვანი სხდომა დაგეგმილი. ხვალ კიდევ უნდა შევჯერდეთ გარკვეულ საკითხებზე და ამის შემდეგ გავაკეთებთ კომენტარს იმასთან დაკავშირებით, თუ კონკრეტულად რა სახის ცვლილებები არის დაგეგმილი... [ვიხილავთ თუ არა ბახტაძის ნაცვლად გახარიას] ამაზე ჩემი კომენტარი უკვე გითხარით".

ამავე პარტიის წევრი, რატი იონათამიშვილი ამბობს, რომ პოლიტიკაში წინმსწრები განცხადებებით საუბარი უპასუხისმგებლოა.

"უმრავლესობა მუდმივად გავდივართ გუნდის შიგნით კონსულტაციებს. პირველ რიგში, ეს კონსულტაციები ეხება იმას, რომ მომავალი კვირიდან ვიწყებთ სასესიო კვირას", — უთხრა დეპუტატმა TV პირველს.

რამდენიმე კვირის წინ, 16 აგვისტოს მოქმედმა პრემიერმა, მამუკა ბახტაძემ ამ საკითხზე დასმულ კითხვაზე პასუხის გაცემის დროს თქვა, რომ გუნდის დაკომპლექტება დამოკიდებული იქნება მომავალ პროგრამაზე.