ტელეკომპანია რუსთავი 2-ის ყოფილი დირექტორი, ნიკა გვარამია გირაოს შეფარდებისა და საზღვრის კვეთის შეზღუდვაზე თბილისის საქალაქო სასამართლოს განჩინებას გაასაჩივრებს. ამის შესახებ მისმა ადვოკატმა, დიმიტრი საძაგლიშვილმა განჩინების ჩაბარების შემდეგ TV პირველთან საუბრისას განაცხადა.

"შაბლონური დასაბუთებით არის შემოფარგლული მოსამართლე. ის აპელირებს, რომ საქმეზე შესაძლოა დაკითხული იქნენ ის პირები, რომლებთანაც ნიკა გვარამიას ჰქონდა სამსახურეობრივი ურთიერთობა და ამიტომ არსებობს იმის რისკი, რომ ზეწოლა მოახდინოს მათზე, რათა მისცენ მისთვის სასურველი ჩვენება. სასამართლომ მიიჩნია, რომ 40 ათასის გადახდით ეს რისკი გამოირიცხება", — განაცხადა საძაგლიშვილმა.

გუშინ, 10 აგვისტოს რუსთავი 2-ის 9-პროცენტიანი წილის ყოფილი მფლობელის საჩივრის საფუძველზე სასამართლოში ნიკა გვარამიასთვის აღკვეთის ღონისძიების საკითხი განიხილებოდა. მოსამართლემ მიიჩნია, რომ ნაწილობრივ უნდა გაეთვალისწინებინა ბრალდების მხარის პოზიცია და გვარამიას 40 ათასლარიანი გირაო შეუფარდა და პროკურატურის ნებართვის გარეშე საზღვრის კვეთა აუკრძალა.

ნიკა გვარამიამ ბრალის წაყენების დროსაც და სასამართლო სხდომაზეც განაცხადა, რომ ის არ დაემორჩილებოდა აღკვეთის ღონისძიების არც ერთ სახეს და მისი დაპატიმრება მოუწევდათ.

აღკვეთის ღონისძიებაზე მსჯელობას წინ უსწრებდა, 9 აგვისტოს ნიკა გვარამიასთვის ბრალის წაყენება. მას არხის დირექტორად მუშაობის დროს საზიანო გადაწყვეტილების მიღებას ედავებიან.

გვარამიას წინააღმდეგ საჩივარი პროკურატურაში 16 ივლისს რუსთავი 2-ის 9-პროცენტიანი წილის ყოფილმა მფლობელმა, ნინო ნიჟარაძემ შეიტანა. ნიჟარაძე ტელეკომპანიის დირექტორის მიერ უფლებამოსილების ბოროტად გამოყენების მუხლით გამოძიების დაწყებას ითხოვდა. ისვე აცხადებდა, რომ გვარამიას გადაწყვეტილებებმა არხს ფინანსური ზიანი მიაყენა. სწორედ ამ საქმეზე აპირებს პროკურატურა ტელევიზიის ყოფილი დირექტორისთვის ბრალის წაყენებას.