საპენსიო სააგენტოს დირექტორმა, ლევან სურგულაძემ 11 თვეში ანაზღაურების სახით 157 500 ლარი მიიღო. ამის შესახებ ინფორმაცია On.ge-მ უწყებიდან საჯარო ინფორმაციის სახით მიიღო.

პირველად მას ანაზღაურება ნოემბერში დაერიცხა. დარიცხული თანხა 37 500 ლარი იყო. სააგენტო განმარტავს, რომ თანხა 2,5 თვის ხელფასია.

საპენსიო სააგენტომ 11-თვიანი მუშაობის განმავლობაში 2 120 387 ლარი დახარჯა. უწყებიდან მიღებული ინფორმაციით ირკვევა, რომ სააგენტომ თეთრების სიზუსტით აითვისა ბიუჯეტიდან მიღებული დაფინანსება და დასახარჯი თანხა არ დარჩენია.

დახარჯული თანხის ნახევარზე მეტი, 1 306 731 ლარი დასაქმებული ადამიანების ანაზღაურება იყო. გაწეული ხარჯების ხუთეულში მოხვდა "ძირითადი აქტივების შეძენა" (335 366 ლარი), ოფისის იჯარა (108 970 ლარი) და რეკლამის ხარჯი (105 366 ლარი).

შენიშვნა: მასალის თავდაპირველ ვერსიაში აღნიშნული იყო, რომ ხარჯები 9 თვეს მოიცავდა. სააგენტომ დააზუსტა, რომ მონაცემები 11 თვეს ასახავს, თუმცა თანხა 9 თვის განმავლობაში გადაირიცხა.