უზენაესი სასამართლოს მოსამართლეობის კანდიდატმა პაატა სილაგაძემ ნაზი ჯანეზაშვილის კითხვას, არსებობს თუ არა რეალურად მოსამართლეთა გავლენიანი ჯგუფი სისტემაში, უპასუხა: "თითქმის, შეიძლება, სასამართლოს გულში ვიწვი და მე ეგეთი არაფერი მიგრძვნია".

"21 წელი გახდა 27 ივნისს, რაც სასამართლო სისტემაში ვმუშაობ. ალბათ, ჩემზე დაბალი თანამდებობა დამლაგებელი იყო. ჩემს თვალწინ გაიარა ყველა ეტაპმა, ყველა რეფორმამ, ყველა ცვლილებამ, სხდომის მდივანიც ვყოფილვარ, თანაშემწეც ვყოფილვარ, მოსამართლეც ვიყავი, საბჭოშიც, აპარატშიც მიმუშავია, საერთო სასამართლოების დეპარტამენტშიც ვმუშაობდი... რა გავლენებზეა საუბარი ყველა თავის საქმეს აკეთებს, არავის არ უთქვამს და არავის უკადრებია, მოდი ეს საქმე ასე არა ასე გადაწყვიტე, მაგას ვერც იტყვის და ვერც მაკადრებს, და სხვა მხრივ ყველას მიმართ მაქვს მეგობრული და პატივისცემით დამოკიდებულება, ასევე ჩემს მიმართაც ვგრძნობ იგივეს", — თქვა მოსამართლეობის კანდიდატმა.