მომღერალი და მსახიობი ბუბა კიკაბიძე აცხადებს, რომ ქართული ოცნების თავმჯდომარემ, ბიძინა ივანიშვილმა საზოგადოება ორად გახლიჩა. მისი თქმით, ერთ მხარეს ივანიშვილის მხარდამჭერები დგანან, რომლებსაც მან სამსახური დააწყებინა. მეორე მხარეს კი ის ხალხი, ვისაც ივანიშვილი არ მოსწონს.

"ბევრ მათგანს შეხება არ აქვს იმ პროფესიასთან, რომელზეც დანიშნეს. სამახურის შოვნა ახლა საკმაოდ ძნელია და ის [ივანიშვილი] ამით იჭერს ხალხს. მეორე ნაწილი კი ის ხალხია, რომელსაც არ უყვარს და ეჩხუბებიან", — განაცხადა კიკაბიძემ რადიო თავისუფლების ყირიმის ბიუროსთან იტერვიუში.

კიკაბიძემ #სირცხვილიაზეც ისაუბრა და განაცხადა, რომ ამ რაოდენობის ახალგაზრდა აქციაზე არასდროს უნახავს, მიუხედავად იმისა, რომ თბილისში ბევრი საპროტესტო მიტინგი გამართულა. მანვე აღნიშნა, რომ ხელისუფლებას აქციის დაშლის იმედი აქვს, მაგრამ მისი თქმით, ახალგაზრდობა 20 ივნისის სისხლიან ღამეს არ აპატიებს.