რესპუბლიკელების ლიდერი, დავით უსუფაშვილი ენმ-ს წევრის, გივი თარგამაძის მანქანის აფეთქებას ეხმაურება და ამბობს, რომ ეს ენმ-სა და ქართულ ოცნებას შორის მიმდინარე პროცესების ლოგიკური გაგრძელებაა:

"გუშინდელი ფაქტი, სამწუხაროდ, არის ლოგიკური გაგრძელება იმ პროცესის, რომელსაც ერთის მხრივ სახელისუფლებო პარტია - ქართული ოცნება, მეორეს მხრივ ყოფილი სახელისუფლებო პარტია - ნაციონალური მოძრაობა ამკვიდრებენ ქვეყანაში. როდესაც სიძულვილი არის მთავარი იარაღი არჩევნებში გამარჯვების, მაშინ ასეთი სამწუხარო და ტრაგიკული ფაქტები არ არის გამორიცხული. რა თქმა უნდა, ყველამ ჩვენ უნდა დავგმოთ ყველა ის ადამიანი, ვისაც რაიმე შეხება აქვს ამ ქმედებასთან. ეს ყველაფერი ხდება იმისთვის, რომ ჩვენზე, საქართველოს მოქალაქეებზე ვიღაცებმა მოახდინონ ისეთი გავლენა, როგორიც მათ სურთ".

4 ოქტომბერს, თბილისში, კოლმეურნეობის მოედნის მიმდებარე ტერიტორიაზე ნაციონალური მოძრაობის წევრის, გივი თარგამაძის მანქანა აფეთქდა. დაზიანდა მიმდებარე შენობები, ასევე ახლომდებარე ავტომობილები, დაშავდნენ გამვლელები. ჯანდაცვის მინისტრის ინფორმაციით, მანქანის აფეთქებისას დაშავებულთა რიცხვი ხუთია. მათგან ერთ-ერთს საავადმყოფოში ოპერაცია ჩაუტარდა.

შსს-მ გამოძიება დამამძიმებელ გარემოებაში, განზრახ მკვლელობის მცდელობის მუხლით დაიწყო.

გივი თარგამაძე დარწმუნებულია, რომ მისი ავტომობილი მართვადი ასაფეთქებლით ააფეთქეს და პასუხისმგებლობას ხელისუფლებას აკისრებს.