adjaranet.com გაიყიდა. პორტალი ITDC ჯგუფმა (სს აი თი დი სი) შეიძინა, რომლის შემადგენლობაშიც შედის საიტები: Myvideo.ge; iMovies.ge; amindi.ge. აჭარანეტის გაყიდვის შესახებ ინფორმაცია თავდაპირველად კომერსანტმა გაავრცელა. გამოცემის ცნობით, ITDC ჯგუფმა Pos TV-იც შეიძინა, თუმცა, ამ საკითხზე კომპანიაში არ საუბრობენ.

On.ge აჭარანეტის გაყიდვასთან დაკავშირებით adjara.com-ის მთავარ რედაქტორს, ბაჩა მალაზონიას ესაუბრა. მისი თქმით, adjara.com-მა გადაწყვიტა, კინოინდუსტრია საერთოდ დატოვოს და მთელი რესურსი სპორტული ინდუსტრიის განვითარებისკენ მიმართოს.

"ჩვენ ვრჩებით დიჯიტალურ მედიაში. მივიღეთ მნიშვნელოვანი გადაწყვეტილება და გადავერთეთ მთლიანად სპორტული სტრიმინგის მიმართულებით. ეს არის სტრატეგიული ცვლილება adjara.com-ის", — ამბობს მალაზონია.

მისივე თქმით, მთლიანად ჩამოშორდნენ გართობის ინდუსტრიას, მათ შორის გაყიდვა შეეხო cinemania.com-საც.

"ვიწყებთ წამყვან სპორტულ ლიგებთან, ინდუსტრიასთან კომუნიკაციას, ძალიან მნიშვნელოვანი პარტნიორები გაგვიჩნდა. უახლოეს მომავალში ძალიან მნიშვნელოვან ცვლილებებს გაიგებთ", — აღნიშნა მალაზონიამ.