დეპუტატი ეკა ბესელია ქართული ოცნების თავმჯდომარეს, ბიძინა ივანიშვილს აფრთხილებს. მისი თქმით, ბიძინა ივანიშვილი, "რომელსაც სჭირდება ზარდიაშვილის ნაირი სპიკერები, საბრალოა".

"მინდა ივანიშვილი გავაფრთხილო, თუ ასეთ არარაობებს კვლავ გამოიყვანს სპიკერად, ასეთი სიბინძურეებს სალაპარაკოდ, ძალიან მკაცრი და ძალიან მძიმე მოსასმენი იქნება ჩემი პასუხები. აქ დავსვამ ახლა წერტილს, მემგონი გასაგებად ვლაპარაკობ და ვაფრთხილებ", — აღნიშნა რუსთავი 2-თან საუბრისას ეკა ბესელიამ.

ქართული ოცნების წევრმა, ვანო ზარდიაშვილმა თქვა, რომ ეკა ბესელია ე.წ. ვირთხაა, რომელსაც უმრავლესობის სხდომებიდან ინფორმაცია გაჰქონდა და რუსთავი 2-ს, კერძოდ კი ნოდარ მელაძეს აწვდიდა. ეკა ბესელიამ აღნიშნა, რომ ვანო ზარდიაშვილს ამას არ აპატიებს. ეკა ბესელია აპირებს, რომ პარლამენტის ეთიკის საბჭოში ვანო ზარდიაშვილისთვის დეპუტატის მანდატის შეჩერების საკითხს დააყენებს. ამავე თემასთან დაკავშირებით, ვიცე-პრემიერმა, მაია ცქიტიშვილმა აღნიშნა, რომ ეკა ბესელიას მხრიდან ფარული კადრების გავრცელებაზე საუბარი "დამღლელია".

22 ივლისს ეკა ბესელიამ რუსთავი 2-თან საუბარში თქვა, რომ "ამდენი დროის" გასვლის მიუხედავად, ისევ პასუხგაუცემელია კითხვები, თუ ვინ არის ფარული ვიდეოკადრების ავტორი. დეპუტატ ეკა ბესელიას საჯარო განცხადებიდან მეორე დღეს, 23 ივლისს შინაგან საქმეთა სამინისტრომ პასუხისგებაში მისცა სომხეთის ციხეში მყოფი პირი. ეკა ბესელიას თქმით, გამოძიებას ამ პირთან დაკავშირებით ინფორმაცია რამდენიმე თვის წინაც ჰქონდა და უწყებაში მას უთხრეს, რომ ეს პირი პირველწყარო არ ყოფილა.