იუსტიციის უმაღლეს საბჭოში უზენაესი სასამართლოს მოსამართლეობის კანდიდატებთან გასაუბრებაზე გენერალური პროკურორი შალვა თადუმაძე იმყოფება. საბჭოს წევრმა დიმიტრი გვრიტიშვილმა აღნიშნა, რომ მას რეკომენდატორებში მხოლოდ მმართველი პარტიის პოლიტიკოსები ჰყავს მითითებული, რაც ჟურნალისტებს კითხვებს უჩენს მიკერძოებულობაზე.

თადუმაძის რეკომენდატორები არიან ქართული ოცნების დეპუტატები ირაკლი სესიაშვილი და კობა კობალაძე და ინფრასტრუქტურის მინისტრი მაია ცქიტიშვილი. თადუმაძის თქმით, ეს ადამიანები არა პოლიტიკური ნიშნით, არამედ იმიტომ აარჩია, რომ კარგად იციან მისი კვალიფიკაცია.

"ირაკლი სესიაშვილთან მე გავატარე 11 წელი არასამთავრობო ორგანიზაციაში, ის იყო ჩემი ხელმძღვანელი და თუ ვინმემ ამ ქვეყანაში იცის ჩემი კვალიფიკაცია იცის ირაკლი სესიაშვილმა... თუ კიდე ვინმემ იცის, რა შესაძლებლობები გამაჩნია პროფესიული და ადამიანური, იცის მაია ცქიტიშილმა, იმიტომ, რომ მე და ქალბატონმა მაიამ ერთად ვიმუშავეთ 6 წლის მანძილზე მთავრობის ადმინისტრაციაში, ის იყო მთავრობის ადმინისტრაციის ხელმძღვანელი და მე ვიყავი მთავრობის საპარლამენტო მდივანი და ჩვენ გვქონდა კვეთა ერთმანეთთან მუშაობის...

კობა კობალაძე, რომელიც არის ჩემი მეგობარი, ასევე პარლამენტის წევრი და ერთადერთი ბრალდებული, რომელიც შევძელი, რომ სასამართლო დარბაზიდან გამომეყვანა მაშინ, როდესაც გამამართლებელი განაჩენების მაჩვენებლები არც ისე მაღალი იყო", — განაცხადა მან.

შალვა თადუმაძე უკვე ერთი წელია, რაც გენერალური პროკურორია. მანამდე, ექვსი წლის განმავლობაში, მთავრობის ადმინისტრაციის საპარლამენტო მდივანი იყო. თადუმაძე ეწეოდა საადვოაკტო საქმიანობას. ის ბიძინა ივანიშვილის პირადი იურისტი იყო.