ორი წლის წინ, შემოდგომაზე, ჰოლივუდი დაუგეგმავმა ონლაინ კამპანიამ, #MeToo მოიცვა. წარმატებული მსახიობი ქალები ჰოლივუდის ერთ-ერთი ყველაზე გავლენიანი პროდიუსერის გარყვნილ ქმედებებზე ალაპარაკდნენ. 100-ზე მეტმა ქალმა ჰარვი ვაინშტაინი სექსუალურ შევიწროებაში, ძალადობასა და გაუპატიურებაში დაადანაშაულა.

მას შემდეგ, უამრავმა ქალმა და კაცმა სექსუალურ ძალადობაზე აიმაღლა ხმა.

Untouchable (ხელშეუხებელი) — ასე ჰქვია Hulu-ს მიერ გადაღებულ დოკუმენტურ ფილმს, რომელიც ჰარვი ვაინშტაინის საქმეს ეხება. მასში ქალები იმ ძალადობაზე ყვებიან, რომელიც ჰოლივუდის ლამაზი ფასადის მიღმა წლების განმავლობაში იმალებოდა.

ურსულა მაკფარლეინის მიერ გადაღებული ფილმის პირველ ტრეილერში, ძალადობის ერთ-ერთი სავარაუდო მსხვერპლი, როზანა არკეტი იხსენებს, რომ 90-იანებში ვაინშტაინმა ბევერლი ჰილზის სასტუმროში აიძულა, მის პენისს შეხებოდა:

"როდესაც ამაზე საუბარი ვცადე, ყველამ მითხრა, რომ ჩემთვისვე აჯობებდა, მომეკეტა".

ვაინშტაინს გაუპატიურებაში ადანაშაულებს დოკუმენტური ფილმის ერთ-ერთი მონაწილე, რომელიც მის მუსიკალური პრომოუშენის კომპანიაში მუშაობდა.

"გაუპატიურებას დამატებითი ზიანიც მოჰყვება, ეს რაღაც მნიშვნელოვანს გპარავს", — ამბობს ის და დასძენს, რომ ძალადობრივმა გამოცდილებამ მისი ცხოვრება შეცვალა.

New Yorker-ის რეპორტიორი, რონან ფაროუ პირველი იყო, ვინც ვაინშტაინის წინააღმდეგ ბრალდებებზე ცნობილი მსახიობების ინტერვიუ გამოაქვეყნა. მათ შორის იყო ეშლი ჯადიც.

"მეუბნებოდნენ, რომ ეს ქალები გიჟები იყვნენ", — ყვება ჟურნალისტი.

ზელდა პერკინსი, რომელიც ვაინშტაინის საქმეში ერთ-ერთი მსხვერპლი და მბრალდებელია, ამბობს, რომ ძალადობა ათწლეულები გრძელდებოდა, რაც "სისტემამ დაუშვა".

Untouchable-ის პრემიერა Sundance Film Festival-ზე შედგა და ის მაისში Hulu-მ რამდენიმე მილიონ დოლარად შეიძინა. დოკუმენტური ფილმის მსოფლიო პრემიერა 2 სექტემბერს შედგება.

ჰარვი ვაინშტაინის საქმეს ლონდონის, ნიუ-იორკისა და ლოს-ანჯელესის პოლიცია იძიებს.