სახელმწიფო უსაფრთხოების სამსახურის ცნობით, სომხეთიდან საქართველოს გავლით რუსეთში ოთხ ფუთაში დაფასოებული ნივთიერების, თორიუმის გადატანა სცადეს. უწყებამ გამოძიება რადიოაქტიური მასალებისადმი უკანონო მოპყრობისა და საბაჟო წესების
დარღვევის მუხლით დაიწყო. რადიაციის აღმომჩენი განგაშის სიგნალი საქართველო-სომხეთის საზღვრის, სადახლოს საკონტროლო-გამშვებ პუნქტზე ჩაირთო.

სუს-ის მიერ გავრცელებულ განცხადებაში ნათქვამია, რომ აღნიშნული ფუთების საერთო წონა 71,63 კილოგრამია. ისინი შეიცავენ რადიოაქტიურ იზოტოპს თორიუმ 232, რომელიც მიეკუთვნება ბირთვულ მასალათა კატეგორიას.

"გამოსხივების დოზის სიმძლავრე ფუთების ზედაპირზე შეადგენდა 18-მდე მიკროზივერტს/სთ-ს. აღსანიშნავია, რომ მაქსიმალური უსაფრთხო სიმძლავრე წარმოადგენს 0,5 მკზტ/სთ. ამოღებული ნივთიერება საშიშია ადამიანის სიცოცხლისა და ჯანმრთელობისათვის. გამოძიების პროცესში დააკავეს ამოღებული ტვირთის მფლობელი, სომხეთის მოქალაქე
მილიტოს მ, რომელსაც თბილისის საქალაქო სასამართლომ აღკვეთის ღონისძიების სახით შეუფარდა პატიმრობა", — განაცხადეს სუს-ში.

გამოძიება რადიოაქტიური მასალების უკანონო მოპყრობისა და გადაზიდვის მუხლით
მიმდინარეობს, რომელსაც სუს აწარმოებს.