ქართული სახვითი ხელოვნების მუზეუმმა მხატვარ დავით მაჭავარიანის და სულაკაურის გამომცემლობის ერთობლივ საეტაპო პროექტს — ვეფხისტყაოსნის გრაფიკულ ვერსიას 10 ივლისს უმასპინძლა.

მუზეუმის დროებითი გამოფენების დარბაზში გაიხსნა არტისტის სოლო გამოფენა და გაიმართა გრაფიკული რომანის პრეზენტაცია, რომელსაც დავით მაჭავარიანი თითქმის 4 წლის განმავლობაში ქმნიდა. დამსწრეებს საშუალება ჰქონდათ, შეეძინათ წიგნის პირველი, ლიმიტირებული გამოცემა.

გრაფიკული რომანის 222 გვერდიანი ესკიზების გარდა, ექსპოზიციაზე წარმოდგენილი იყო დავით მაჭავარიანის ყველა ნამუშევარი, რომელსაც ის 10 წლის განმავლობაში ვეფხისტყაოსნის თემატიკაზე ქმნიდა. მათ შორისაა კლასიკური გამოცემის ილუსტრაციები. 2014 წელს ვეფხისტყაოსნის მიხედვით დავით მაჭავარიანმა შექმნა სამკაულების კოლექცია ზარაფხანასთვის, რომელიც ასევე გამოფენილი იქნება ქართული სახვითი ხელოვნების მუზეუმის სივრცეში.

გრაფიკული რომანით ვეფხისტყაოსანი სულაკაურის გამომცემლობამ საკუთარი 20 წლის იუბილე აღნიშნა, დავით მაჭავარიანმა კი ვეფხისტყაოსნის თემატიკაზე 10 წლიანი მუშაობის პროცესი დაასრულა.

ფოტო: დავით მაჭავარიანი

ხელოვანმა პოემის თითოეული ეპიზოდისა და ლეგენდარული პერსონაჟების უნიკალური, სრულიად ახალი და განსხვავებული სახეები შექმნა. გრაფიკული რომანისთვის ტექსტის ადაპტაციაზე პრემია საბას ლაურეატმა მწერალმა, სალომე ბენიძემ იმუშავა. ტექსტში შენარჩუნებულია აფორიზმები და ზოგიერთ შემთხვევაში რუსთაველის ორიგინალი სტრიქონებიც (ტექსტის 20% ორიგინალ ენაზეა, 80% გათანამედროვებულ, კომიქსზე მორგებულ ენაზე).

მაჭავარიანი გრაფიკული რომანის ერთ გვერდზე დაახლოებით 4-5 დღის განმავლობაში მუშაობდა. დასაწყისი დაახლოებით 4 თვის განმავლობაში იქმნებოდა, ყოფილა ნახატი, რომელსაც 3-4 კვირის მანძილზე მუშაობაც დასჭირვებია. ახალ გამოცემაში 2000-მდე ილუსტრირებული პანელი 222 გვერდზეა გადანაწილებული.

ფოტო: დავით მაჭავარიანი

ვეფხისტყაოსნის გრაფიკული ვერსიის უპირველესი აუდიტორია სკოლის მოსწავლეები არიან, რომლებსაც პოემის ორიგინალ ენამდე მისასვლელად კომიქსი შინაარსის უკეთ აღქმაში დაეხმარებათ. ახალი წიგნი უკვე ითარგმნება ინგლისურ და რუსულ ენებზე და უცხოენოვან გამოცემებს მკითხველი შემოდგომაზე უნდა ელოდოს.

ამაზონზე მომხმარებელს მხატვრის მიერ შექმნილი მაისურის შეძენაც შეუძლია, რომელსაც ტარიელის მუზარადი და წარწერა პოემიდან - "ასი ათასსა აჯობებს, თუ გამორჩევით მქმნელია" ამშვენებს.

დავით მაჭავარიანი ბავშვობიდან სხვადასხვა სამხატვრო სტუდიაში სწავლობდა. 1993 წელს ჩააბარა თბილისის სახელმწიფო სამხატვრო აკადემიაში - კერამიკის ფაკულტეტზე. გარკვეული პერიოდის შემდეგ გადავიდა მულტიპლიკაციის ფაკულტეტზე და სწავლა იქ განაგრძო.

დავით მაჭავარიანი

დავით მაჭავარიანი

ფოტო: ქართული სახვითი ხელოვნების მუზეუმი

აკადემიის დასრულებისთანავე გაემგზავრა ამერიკის შეერთებულ შტატებში, სადაც ითანამშრომლა Cinetic Theatre-თან. პარალელურად, ფილადელფიაში გაიცნო DC Comics-ის რედაქტორი - დენ რასპლერი, რომელმაც მნიშვნელოვანი გავლენა იქონია მხატვრის შემდგომი შემოქმედებითი გზის ჩამოყალიბებაზე.