რუსთაველის გამზირზე, პარლამენტის წინ ორივე აქცია (ანტისაოკუპაციო და ჰომოფობიური) დაიშალა. ტერიტორიაზე ამ დროისთვის სამართალდამცველები და ანტისაოკუპაციო აქციის რამდენიმე ორგანიზატორი რჩება.

ანტისაოკუპაციო აქცია #სირცხვილია 7 საათზე განახლდება. როგორც ერთ-ერთმა ორგანიზატორმა, შოთა დიღმელაშვილმა თქვა, პოლიცია მათ დაპირდა, რომ საღამოს პარლამენტის წინ ადგილი თავისუფალი იქნება.

რაც შეეხება ჰომოფობიურ აქციას, ერთ-ერთმა მონაწილემ, გურამ ფალავანდიშვილმა განაცხადა, რომ ისინი იშლებიან და "შეიძლება ბიძინას სახლთან გადავიდნენ, რათა დეოკუპაციის აქციას ხელი არ შეუშალონ".

8 ივლისს რუსთაველის გამზირზე ერთდროულად ორი აქცია მიმდინარეობდა. აქცია #სირცხვილიას მონაწილეებს ჰომოფობიურად განწყობილმა ჯგუფებმა პარლამენტის წინ დადგომის საშუალება არ მისცეს და არც აპარატურა ააწყობინეს. საათების განმავლობაში ორ აქციას პოლიციის კორდონი და ყვითელი ავტობუსები ჰყოფდა.

აქციის მონაწილეებმა მთელი ღამე რუსთაველის გამზირზე გაათენეს. რამდენჯერმე მოხდა მცირე დაპირისპირება. გამთენიისას ჩაკეტილი რუსთაველის გამზირი გაიხსნა. აქცია #სირცხვილიას მონაწილეებმა პარლამენტთან ტერიტორია დაიკავეს.