მაკო გომურმა, რომელიც 20 ივნისის აქციის დაშლის დროს თვალი დაკარგა, რუსთაველზე მიმდინარე აქციის #სირცხვილია მონაწილეებს მიმართა.

მან პარლამენტთან შეკრებილებსა და სხვა მოქალაქეებს მხარდაჭერისთვის მადლობა გადაუხადა.

"თქვენ რომ გაქვთ ბრძოლის უნარი, მერე მე ეს მაძლევს ბრძოლის უნარს და ამით მაქვს ძალა, რომ თქვენ გხედავთ, როგორ იბრძვით ჩემთვის და ყველა ჩვენგანისთვის. ჩემთვის თქვენ ხართ გმირები იმიტომ, რომ არ ნებდებით, არ ნებდებით არც ერთი წუთი... მინდა იცოდეთ, რომ მე მჯერა თქვენი. მჯერა იმის, რისთვისაც დგახართ მანდ... მანდ სამშობლოს გამო დგახართ, უსამართლობის გამო, რაც მოხდა 20 ივნისს... ვინც დავშავდით, მინდა, ვიყოთ ბოლო ადამიანები, რომლებიც დაგვასახიჩრეს 20 ივნისის ღამეს... თუ ვიღაც დღეს ჩვენზე ამბობს ცუდს, იმიტომ ამბობს, რომ ვერ ხედავს იმ უსამართლობას, რაც ხდება. მინდა, რომ თავისუფალ და დალაგებულ ქვეყანაში ვიცხოვროთ ყველამ ერთად", — მიმართა მაკომ აქციის მონაწილეებს.

20 ივნისის აქცია

რუსი დეპუტატის, სერგეი გავრილოვის მიერ სკამის დაკავებას საპროტესტო ტალღა მოჰყვა პარლამენტის წინ. მოქალაქეებმა ანტისაოკუპაციო აქციები მოაწყეს. დღის ბოლოს კი პარლამენტის წინ შეიკრიბნენ. ოპოზიციის წევრები ითხოვდნენ ირაკლი კობახიძის, ვახტანგ გომელაურისა და გიორგი გახარიას გადადგომას.

აქციის მონაწილეების ნაწილმა პარლამენტში შესვლა სცადა და ცენტრალურ გამზირზე მობილიზებულმა სპეცრაზმმა მათი დაშლა დაიწყო. სამართალდამცავებმა მოქალაქეების წინააღმდეგ რეზინის ტყვიები, ცრემლსადენი გაზი და წყლის ჭავლი გამოიყენეს. აქციის დაშლის დროს კლინიკებში 240 მოქალაქე გადაიყვანეს, რომელთაგან 80 სამართალდამცავი იყო. დაშავებულებიდან 2-მა თვალი დაკარგა, მათ შორის 18 წლის გოგომ. დაზიანებები მიიღეს 30-ზე მეტმა ჟურნალისტმა, მათ შორის იყვნენ On.ge-ს სამი თანამშრომელი.

შინაგან საქმეთა სამინისტრომ სხვადასხვა სამართალდარღვევისთვის ჯამში 305 ადამიანი დააკავა. საქმეზე გამოძიება სისხლის სამართლის კოდექსის 225-ე მუხლით, რაც ჯგუფური ძალადობის ორგანიზებას, ხელმძღვანელობას ან მასში მონაწილეობას გულისხმობს.