გაერთიანებული ოპოზიცია ხელისუფლებას საარჩევნო სისტემის ცვლილებასთან დაკავშირებით სამი წინადადებით მიმართავს და მოუწოდებს, უზრუნველყოს ოპოზიციური პარტიებისა და სამოქალაქო საზოგადოების ჩართულობა კანონპროექტის შემუშავების პროცესში.

გაერთიანებული ოპოზიციის ლიდერის, მამუკა კაციტაძის განცხადებით, გაერთიანებულმა ოპოზიციამ უკვე მიმართა პარლამენტს 300 000 ხელმოწერით და მათ მიერ მომზადებული კანონპროექტის დარეგისტრირება მოსთხოვა. კანონპროექტი მაჟორიტარული სისტემის პროპორციულით ჩანაცვლებას მოითხოვდა.

ახლა, როცა ხელისუფლებამ პოლიტიკური გადაწყვეტილება უკვე მიიღო და არჩევნები 2020 წელს პროპორციული წესით ჩატარდება, ოპოზიცია მოუწოდებს უმრავლესობას დაარეგისტრიროს როგორც საკუთარი, ისე გაერთიანებული ოპოზიციის მიერ წარდგენილი საკონსტიტუციო ცვლილებების პროექტი.

მეორე მოთხოვნა საერთო სახალხო განხილვის კომისიას უკავშირდება. გაერთიანებული ოპოზიცის განცხადებით, უნდა შეიქმნას ფორმატი, რომელიც იქნება "იდეალური საშუალება დიალოგის საწარმოებლად".

"აღნიშნული კომისია უნდა იყოს მაქსიმალურად წარმომადგენლობითი, ხელისუფლების წარმომადგენლები, საპარლამენტო და არასაპარლამენტო ოპოზიცია, საზოგადოება. კარგი იქნება, შევთავაზოთ იმ საპროტესტო ტალღის წარმომადგენლებსაც მონაწილეობის მიღება, რომლებმაც თავისი წვლილი შეიტანეს ამ პროცესში", — განაცხადა მამუკა კაციტაძემ.

მესამე, ოპოზიცია აცხადებს, რომ დიალოგისთვის მზადაა და გამოხატავს სურვილს, რომ მათი და უმრავლესობის წინადადება ერთ საკანონმდებლო პაკეტად აქციონ.

ქართული ოცნება-დემოკრატიული საქართველოს საკონსტიტუციო ინიციატივის —პროპორციული არჩევნები 2020-ის პრეზენტაცია პირველ ივლისს გაიმართება.

24 ივნისს ქართული ოცნების თავმჯდომარემ ბიძინა ივანიშვილმა 2020 წლის საპარლამენტო არჩევნების ჩატარება სრულად პროპორციული წესით, ნულოვანი (ბუნებრივი) ბარიერით დააანონსა. ახალი წესით, ბუნებრივი ბარიერის პირობებში, პარლამენტში პარტიებისთვის ერთი მანდატის მისაღებად, შესაძლოა, დაახლოებით 0,67%-იანი ბარიერის გადალახვა იყოს საჭირო.

გაიგე მეტი: