გერმანიის პატარა ქალაქის, აჰლბახის მაცხოვრებლები დილის 4 საათზე ხმაურმა გამოაღვიძა, რასაც მიწისძვრაც მოჰყვა. ხმაური სიმინდის ყანიდან მოდიოდა, სადაც, სავარაუდოდ, მეორე მსოფლიო ომის დროინდელი ბომბი აფეთქდა.

ადგილზე მისულ გამომძიებლებს ყანაში დაახლოებით 10-მეტრიანი სიგანის კრატერი დახვდათ.

რკინიგზის საწყობი ლიმბურგში, გერმანიაში, დაბომბვის შემდეგ. აპრილი, 1945.

ფოტო: Central Press / Hulton Archive / Getty Images

თავდაპირველი ვერსიით, კრატერი მეტეორიტმა გააჩინა, თუმცა ამჟამად ექსპერტები თითქმის დარწმუნებულნი არიან, რომ ყანაში მეორე მსოფლიო ომის დროინდელი ბომბი აფეთქდა.

ოფიციალური პირები ამბობენ, რომ მეორე მსოფლიო ომის დროს ეს ტერიტორია ხშირად ხდებოდა დაბომბვის სამიზნე, რადგან გარშემო ნაცისტების რკინიგზის საწყობი და რადიოსადგურები იყო განლაგებული.

აღმოუჩენელი ბომბები წლების შემდეგ თავისით ფეთქდება, რადგან მათი დეტონატორები წლების გასვლასთან ერთად ნადგურდება.

გერმანიაში ომის დასრულებიდან 70 წლის შემდეგაც კი პოულობენ აუფეთქებელ ბომბებს. 25 ივნისს ფრანკფურტის ჩრდილოეთით მდებარე დასახლებიდან 2500 ადამიანის ევაკუაცია გახდა საჭირო მას შემდეგ, რაც იქ მეორე მსოფლიო ომის დროინდელი ბომბები აღმოაჩინეს.