20 ივნისის აქციის დაშლის დროს დაშავებული 6 ადამიანი კვლავ საავადმყოფოშია. ამის შესახებ On.ge-ს ჯანდაცვის სამინისტროდან მიაწოდეს ინფორმაცია.

  • ერთ-ერთი პაციენტის მდგომარეობა გაუმჯობესდა, გადაყვანილია პალატაში და რამდენიმე დღეში გაეწერება კლინიკიდან;
  • ალადაშვილის კლინიკიდან გადაყვანილ ერთ-ერთ პაციენტს ჩაუტარდა განმეორებითი ნეიროქირურგიული ოპერაცია. მისი მდგომარეობა ამ ეტაპზე სტაბილურია. მოიხსნა მართვითი სუნთქვის აპარატიდან, კონტაქტურია და იგეგმება მისი უახლოეს პერიოდში საზღვარგარეთ გამგზავრება რეაბილიტაციისთვის;
  • კიდევ ერთ-ერთი პაციენტი რჩება რეანიმაციულ განყოფილებაში ექიმების მეთვალყურეობის ქვეშ.

ჯანდაცვის სამინისტროს საგანგებო სიტუაციების კოორდინაციისა და გადაუდებელი დახმარების ცენტრის ხელმძღვანელი, ავთანდილ თალაკვაძე ამბობს, რომ ექსპერტიზის შედეგების შემდეგ გახდება ცნობილი რისგან მიიღეს პაციენტებმა დაზიანებები.

აქციის დაშლის დროს დაშავდა მინიმუმ 240 ადამიანი. მოქალაქეები და ჟურნალისტები ამბობენ, რომ სპეცრაზმის თანამშრომლები მათ დამიზნებით ესროდნენ.