ლიბერალის დამფუძნებელი, შორენა შავერდაშვილი უარს ამბობს, ისაუბროს გამოცემიდან ყველა ჟურნალისტისა და ყველა რედაქტორის წასვლასთან დაკავშირებით. თანამშრომელმა სწორედ მას დაუკავშირეს რედაქციის დატოვებას.

შავერდაშვილმა On.ge-ს უთხრა, რომ ჯერჯერობით ამ თემაზე საჯაროდ არ საუბრობს.

დღეს, 23 ივნისს რედაქციის თანამშრომლებმა განცხადება გაავრცელეს, სადაც აღნიშნეს, რომ გამოცემის დამფუძნებლის გადაწყვეტილებით თანამდებობებს ხვალიდან, 24 ივნისიდან ტოვებენ.

"შორენა შავერდაშვილს ლიბერალის გუნდის სახელით მივმართეთ წინადადებით, შეექმნა პრეცედენტი და ლიბერალი გადმოეცა ან მოეყიდა ჩვენთვის, ჟურნალისტებისთვის (ჩვენთვის მისაღებ ფასად).

ჩვენს წინადადებაზე მფლობელმა უარი გვითხრა და პასუხად განგვიცხადა, რომ მას არ მოსწონს ლიბერალის პოზიციონირება, დაგვიანონსა საკადრო ცვლილებები, მისი ნდობით აღჭურვილი მმართველის დანიშვნა და ახალი სარედაქციო ხედვის ჩამოყალიბება.

რადგან ჩვენთვის ისედაც ცნობილია კომპანიის მფლობელისა და ჩვენს სარედაქციო და მენეჯმენტთან დაკავშირებულ ხედვებს შორის არსებული განსხვავების შესახებ, მიგვაჩნია, რომ მის მიერ შემოთავაზებული/დაანონსებული ცვლილებების გათვალისწინებით, ლიბერალში ჩვენი დარჩენის შესაძლებლობა ამოიწურა", — ვკითხულობთ ჟურნალისტების განცხადებაში.

განახლება: შავერდაშვილმა On.ge-სთან საუბრის შემდეგ ფეისბუქზე პოსტი დაწერა, რომელსაც უცვლელად გთავაზობთ:

"ძვირფასო ჟურნალისტებო და ლიბერალის გულშემატკივრებო, ძალიან დიდი მადლობა ყველას ყურადღებისთვის, მაგრამ აქაც დავწერ, რომ ჯერ-ჯერობით კონკრეტულ საჯარო განცხადებას არ ვაქვეყნებ.

ზოგადად კი შეგახსენებთ, რომ ლიბერალი და ჩემს მფლობელობაში არსებული მედია გამოცემები, რაც კი ბოლო 15 წლის მანძილზე გვიკეთებია, ყოველთვის იყო დამოუკიდებელი და მიუკერძოებელი არა მხოლოდ პოლიტიკური, არამედ სხვადასხვა ტიპის კონიუნქტურული გავლენებისგან. ამაში იყო ჩვენი უნიკალურობაც და სირთულეც.

სწორედ ასე პოზიციონირდა ლიბერალი 10 წლის წინ მედია ბაზარზე და სწორედ ამ პოზიციონირების შენარჩუნება გვინდა.

ამ პრინციპეპზე დაყრდნობით ვაგრძელებ ლიბერალის გამოცემას და ახალი გუნდის ფორმირებას და ვეცდებით, ლიბერალს ჰქონდეს უფრო ფართო თემატური მრავალფეროვნება, ჰყავდეს უფრო მეტი ახალი და საინტერესო ავტორი და ბლოგერი, ჰქონდეს უფრო მეტი ანალიტიკური სტატია და რეპორტაჟი და მოვლენების უფრო სიღრმისეული ხედვა.

მიხარია, რომ ლიბერალის (იქამდე კი "ცხელი შოკოლადის") წიაღში გამოიზარდა ჟურნალისტების და საინტერესო ავტორების უკვე არაერთი თაობა, ვინც მკითხველის ნდობა მოიპოვა და დღემდე აგრძელებს "საჯარო სიკეთის" სამსახურს, სხვადასხვა ფრონტზე.

რაც ბოლო დღეებში განვითარებულმა მოვლენებმაც ცხადჰყო, მოდის ძალიან საინტერესო ახალგაზრდა თაობა და სწორედ მათ მინდა დავუთმოთ ლიბერალის უკვე 10-წლიანი პლატფორმა და ასპარეზიც! მომავალი მათია!"