ქართული ოცნების აღმასრულებელი მდივანი, ირაკლი კობახიძე ფარული ჩანაწერის გავრცელებას ეხმაურება და განმარტავს, რომ ნაციონალური მოძრაობა პროვოკაციებს აწყობს, თუმცა ხელისუფლება მათ ამის საშუალებას არ მისცემს:

"ძალიან მნიშვნელოვანია დიპკორპუსის ჩართულობა, რომ თავიდან აცილებული იქნეს ყოველგვარი ესკალაცია. კანონის უგულვებელყოფა ნაცმოძრაობის სტილია და ასე დაგვამახსოვრეს თავი 9 წლის განმავლობაშიც და ოპოზიციაში ყოფნის დროსაც. ნაცმოძრაობის სტილია კანონის უარყოფა".

საკითხს ეხმაურება ასევე გარემოს დაცვის მინისტრი, გიგლა აგულაშვილიც და ამბობს, რომ შესაძლოა სახელმწიფო უსაფრთხოების თანამშრომლები ენმ-ს ოფისში მივიდნენ და იქ დაკითხონ პარტიის წევრები:

"რამდენადაც მე ვიცი ითხოვენ, რომ მათთან მივიდნენ, ამას არ გამოვრიცხავ რომ ეს ასეც მოხდეს. სახელმწიფო ინტერესები, ქვეყნის სტრატეგიული ხაზი მოითხოვს იმას, რომ არ შევიდეთ კინკლაობაში ამ ადამიანებთან და მივიღოთ აბსოლუტურად ყველა ზომა იმისთვის, რომ ლოგიკურ სამართლებრივ დასკვნებამდე მივიდეს საზოგადოება".

ფარულ აუდიო ჩანაწერში, რომელიც 27 სექტემბერს გამოქვეყნდა, ისმის მიხეილ სააკაშვილისა და ერთიანი ნაციონალური მოძრაობის ლიდერების ხმა, რომლებიც თითქოს საუბრობენ საქართველოში მოვლენების რევოლუციური სცენარით განვითარებაზე. ჩანაწერში ისმის საუბარი რუსთაველის გამზირის კარვებით გავსებაზე, ივანიშვილის სახლთან აქციებზე, ასევე, მის მიმართ ფიზიკურ ანგარიშსწორებაზე, თუმცა, თავად საუბრის მონაწილეები აცხადებენ, რომ ეს საუბარი რეალური არ არის და ის სახელმწიფო უსაფრთხოების სამსახურის მიერაა დამონტაჟებული.

აღნიშნულთან დაკავშირებით სახელმწიფო უსაფრთხოების სამსახურმა გამოძიება სისხლის სამართლის კოდექსის 315-ე მუხლის 1-ლი ნაწილით დაიწყო. უწყებამ დაკითხვაზე ენმ-ს წევრები დაიბარა, თუმცა ისინი სუსში მისვლას არ აპირებენ.