რუსეთის დუმის დეპუტატი სერგეი გავრილოვი საქართველოში იმყოფება და მართლმადიდებლობის საერთაშორისო ასამბლეას ესწრება. მის ჩამოსვლას საზოგადოების პროტესტი მოყვა, თუმცა გავრილოვი ამბობს, რომ ეს დისკომფორტს არ უქმნის. მისივე თქმით, საქართველო მისი სამშობლოა და აქ ყოფნით ბედნიერია.

"საქართველოში თავს აბსოლუტურად კომფორტულად ვგრძნობ. ვფიქრობ საქართველომ დიალოგი არამხოლოდ ტურიზმსა და ბიზნესსფეროებში უნდა აწარმოონ, არამედ კულტურის მიმართულებითაც", — განაცხადა მან.

გავრილოვმა, რომელიც რუსეთის კომუნისტური პარტიის წარმომადგენელია სხდომაზე გამოსვლისას განაცხადა ისიც, რომ ძალის პოზიციიდან საუბარი და სანქციების დაწესება არასწორია. მისი თქმით, მსოფლიო მართლმადიდებლობის ირგვლივ უნდა გაერთიანდეს.

გავრილოვმა აღნიშნა ისიც, რომ საქართველოსა და რუსეთს შორის ბევრი უსიამოვნება იყო, მაგრამ პრობლემების მოგვარება შესაძლებელია. რუსთავი 2-ის ინფორმაციით, მან განაცხადა, რომ "ამ უსიამოვნებების ინიციატორები საქართვეოში არ იმყოფებიან". მანვე აღნიშნა, რომ 2008 წლის ომი ისტორიაა, რომლისგანაც გაკვეთილები უნდა ვისწავლოთ.

19-22 ივნისს თბილისი მართლმადიდებლობის საპარლამენტთაშორისო ასამბლეას (IAO) მასპინძლობს. 26-ე გენერალური ასამბლეის სესიის თემაა "პარლამენტარიზმის წვლილი თანამედროვე სოციალური და პოლიტიკური მოვლენების გააზრებაში". ასამბლეას სხვა რუსი დეპუტატებიც ესწრებიან.

დუმის დეპუტატების ჩამოსვლას აპროტესტებენ ოპოზიციაში. ევროპული საქართველოს წევრი, გიორგი კანდელაკი ამბობს, რომ დეპუტატების ჩამოსვლა ქვეყნის სუვერენიტეტსა და საერთაშორისო ავტორიტეტს ზიანს მიაყენებს. მმართველი გუნდის დეპუტატი ზაქარია ქუცნაშვილი კი აცხადებს, რომ მიუღებელი განცხადების გამო ქვეყანაში შემოსვლას ვერავის აუკრძალავენ და ამას საერთაშორისო პოლიტიკაში "ქაჯობა" უწოდა.

გაიგეთ მეტი: