ევროპული საქართველოს დეპუტატი, გიორგი კანდელაკი აცხადებს, რომ მართლმადიდებლობის საპარლამენტო ასამბლეას, რომელიც საქართველოში 19 ივნისს იმართება, რუსეთის დუმის რამდენიმე დეპუტატი დაესწრება. მათ შორის არიან სერგეი გავრილოვი, ალექსეი ჩეპა და ივან სუხარევი. ამ დეპუტატებს, ოპოზიციის ცნობით, საქართველოს წინააღმდეგ საჯარო განცხადებები აქვთ გაკეთებული, ნაწილმა კი ოკუპაციის შესახებ კანონი დაარღვია, მათ შორის სერგეი გავრილოვმა.

ქართული ოცნების დეპუტატი, ზაქარია ქუცნაშვილი, რომელიც ასამბლეაში საქართველოს წარმოადგენს, აცხადებს, რომ დეპუტატ სერგეი გავრილოვს ოკუპაციის კანონი არ დაურღვევია და ქართული ოცნების მონაპოვარი, სწორედ, თავისუფლებაა.

"იმის გამო, რომ ჩვენთვის მიუღებელი განცხადებები აქვთ გაკეთებული ვიღაც დეპუტატებს, ეს სულაც არ ნიშნავს იმას, რომ ჩვენ გვაქვს კანონიერი უფლება, არ შემოვუშვათ საქართველოში. იმიტომ, რომ აზრის გამოხატვის გამო თუ დავიწყებთ ჩვენ საერთაშორისო ორგანიზაციების ორგანიზებას და პირიქით, საერთაშორისო ღონისძიების ჩაშლას, ეს იქნება ქაჯობა საერთაშორისო პოლიტიკაში", — განაცხადა ზაქარია ქუცნაშვილმა.

მმართველი პარტიის დეპუტატმა, ზაქარია ქუცნაშვილმა განაცხადა, რომ 19-22 ივნისს თბილისში მართლმადიდებლობის 26-ე გენერალური ასამბლეა გაიმართება. მისი თქმით, საქართველო გაერთიანებულია მართლმადიდებელი ქვეყნების საპარლამენტთაშორისო ასამბლეაში და სწორედ მისი წარმომადგენლები ეწვევიან ქვეყანას.

ამავე თემაზე: კანდელაკი: მართლმადიდებლობის ასამბლეას 3 რუსი დეპუტატი დაესწრება, რაც არასასურველია