საქართველოს პროკურატურა საქართველოს პრეზიდენტის სალომე ზურაბიშვილის მიერ პროკურორების დაჯილდოვებას განცხადებით ეხმაურება.

უწყების ცნობით, საქართველოს პრეზიდენტმა კანონიერებისა და მართლწესრიგის განმტკიცებაში შეტანილი განსაკუთრებული წვლილისთვის ღირსების ორდენით 4 პროკურორი დააჯილდოვა. მათივე ცნობით, ეს სია გენერალური პროკურორის წარდგინება იყო. ღირსების ორდენები გადაეცათ გიორგი გოგაძეს, ნინო აღლემაშვილს, რევაზ ბაღაშვილს და ფრიდონ ქარცივაძეს.

პროკურატურა ღირსების ორდენით დაჯილდოვებულების საქმიანობაზე წერს და აცხადებს, რომ ისინი "ღირსეული კანდიდატები არიან".

ოპოზიცია სალომე ზურაბიშვილს გადაწყვეტილების გამო აკრიტიკებს და აცხადებს, რომ პრეზიდენტმა გახმაურებული და "შეკერილი" საქმეების პროკურორები დააჯილდოვა. მათ შორის ნინო აღმელაშვილი, რომელიც კაბელების საქმის პროკურორი იყო. ასევე დააჯილდოვა პროკურორ ფრიდონ ქარცივაძე, რომელმაც 2011 წელს პასუხისგებაში მისცა ოპოზიციის აქტივისტები, თუმცა მის მიერ გამოძიებულ საქმეს 2013 წელს პარლამენტმა პოლიტიკურად მოტივირებული უწოდა და მის მიერ დაკავებული პირები პოლიტდევნილის სტატუსით გაათავისუფლა.