ერთიანი ნაციონალური მოძრაობის ლიდერი თინა ბოკუჩავა თანაპარტიელის, ბათუმის საკრებულოს წევრის, ნოდარ დუმბაძის სექსისტურ განცხადებას On.ge-სთან საუბარში გამოეხმაურა და თქვა, რომ მიუღებელია მსგავსი გამონათქვამი. ასევე, ხაზგასმით აღნიშნა, რომ თავად არის ქალთა ორგანიზაციის თავმჯდომარე პარტიაში და მისთვის მნიშვნელოვანია ქალთა უფლებების დაცვა:

"ჩემი აზრით სექსისტური გამონათქვამები საჯარო სივრცეში, იქნება ეს პოლიტიკოსი, თუ სხვა, მიუღებელია".

თინა ბოკუჩავა აცხადებს, რომ აქამდე არ იცოდა დუმბაძის განცხადების შესახებ და ამბობს, რომ თუ მან საჯაროდ მოიხადა ბოდიში, ეს უკვე მნიშვნელოვანია.

მას შემდეგ, რაც ცნობილი გახდა, რომ ბათუმის სანაპიროზე მაშველი ქალებიც იმუშავებენ, ბათუმის საკრებულოს წევრმა ერთიანი ნაციონალური მოძრაობის სიით, ნოდარ დუმბაძემ ფეისბუქზე სექსისტური კომენტარი დაწერა: "ზატო, ხელოვნური სუნთქვა ეცოდინებათ". On.ge-სთან საუბარში ის ამბობს, რომ მისი განცხადება სექსისტური და დისკრიმინაციული არ არის და "ცუდი ხუმრობა გამოუვიდა".

მისივე თქმით, მაშველ ქალებს ბოდიშს უხდის: "ნამდვილად არ იყო წინასწარგანზრახული, რომ სექსისტური განცხადება გამეკეთებინა. ხუმრობა იყო. თუ ჩემი ხუმრობით და კომენტარით მივაყენე შეურაცხყოფა მე ბოდიშს ვუხდი ამ გოგოებს".