იტალიელ მსახიობს, ორნელა მუტის რუსეთის პრეზიდენტ ვლადიმერ პუტინთან ვახშმობის მიზეზით სპექტაკლის გაცდენის გამო 6-თვიანი პატიმრობა ემუქრება. წინა ინსტანციის გადაწყვეტილება იტალიის უზენაესმა საკასაციო სასამართლომ ძალაში დატოვა. ინფორმაციას BBC ავრცელებს.

სასამართლომ მსახიობს თეატრისთვის 30 ათას ევროს კომპენსაცია და 500 დოლარის ოდენობის ჯარიმის გადახდა დააკისრა, ჯარიმისა და კომპენსაციის არგადახდის შემთხვევაში მას პატიმრობა ემუქრება.

საქმე ეხება 2010 წელს მომხდარ შემთხვევას. მსახიობმა 10 დეკემბერს დაგეგმილ სპექტაკლში მონაწილეობაზე უარი თქვა და სამედიცინო ცნობა წარადგინა. იმავე დღეს, ორნელა მუტი სანქტ-პეტერბურგში საქველმოქმედო საღამოს დაესწრო, რომელსაც პუტინიც ესწრებოდა.

საქველმოქმედო საღამოდან ფოტოების გავრცელების შემდეგ თეატრის ადმინისტრაციამ მსახიობის წინააღმდეგ სასამართლოში სარჩელი შეიტანა. მაშინ მსახიობს 8-თვიანი პატიმრობა და 600 ევროს ოდენობით ჯარიმის გადახდა დაეკისრა.

ვლადიმერ პუტინი და ორნელა მუტი საქველმოქმედო ვახშამზე

ფოტო: Il Friuli