სახალხო დამცველმა არასრულწლოვანის განმეორებითი ძალადობისგან დაცვის მიზნით შინაგან საქმეთა და ჯანდაცვის მინისტრებს რეკომენდაციით მიმართა.

როგორც ომბუდსმენი განმარტავს, რეკომენდაციის მომზადებას საფუძვლად დაედო არასამთავრობო ორგანიზაცია ადამიანის უფლებათა ცენტრის 2019 წლის 22 მაისის განცხადება, არასრულწლოვანის მიმართ განმეორებითი ძალადობის და სავარაუდო იძულებითი ქორწინების თაობაზე და სახალხო დამცველის აპარატის მიერ განხორციელებული შესწავლის შედეგები, მათ შორის, განხორციელებული მონიტორინგის ვიზიტი.

რეკომენდაციით, სახალხო დამცველმა მოითხოვა, დაიგეგმოს ძალადობის მსხვერპლი არასრულწლოვანის დაცვისა და მხარდაჭერის ღონისძიებები. გარდა ამისა, შეფასდეს არსებული რისკები და ფაქტორები, რამაც შესაძლოა, უარყოფითად იმოქმედოს არასრულწლოვანის ემოციურ მდგომარეობასა და მისი ნების ფორმირებაზე.

"ამასთან, აღნიშნული განხორციელდეს ბავშვის მშობლების როლის გაძლიერებით, მათი მხარდაჭერით და არასრულწლოვანისათვის უსაფრთხო გარემოს უზრუნველყოფით. აუცილებელია სოციალური მომსახურების სააგენტომ და საქართველოს შინაგან საქმეთა სამინისტრომ დროულად გაატარონ ბავშვის დაცვისა და მხარდაჭერის ღონისძიებები. მათ შორის, გამკაცრდეს კონტროლი რეფერირების პროცედურის შესრულებაზე", — აღნიშნულია სახალხო დამცველი განცხადებაში.

ომბუდსმენი აღნიშნავს, რომ ადრეულ ასაკში ბავშვთა ქორწინებას ხშირ შემთხვევაში, ფაქტობრივი ოჯახური ურთიერთობის გამო, ყურადღება არ ექცევა. როგორც განცხადებაშია აღნიშნული, უმეტესწილად ქორწინების ნებაყოფლობითობას ან/და ტრადიციულ ფაქტორს უსვამენ ხაზს. ამასთანავე, არ ტარდება ღონისძიებები არასრულწლოვანის საუკეთესო ინტერესების დაცვის უზრუნველსაყოფად.