საარჩევნო კანონმდებლობის რეფორმაზე პარლამენტში პირველი სამუშაო შეხვედრა იმართება. 13 ივნისის შეხვედრას ესწრებიან პარლამენტის დეპუტატები, არასაპარლამენტო ოპოზიციის წევრები, არასამთავრობო ორგანიზაციების წევრები, ცესკოს წარმომადგენლები და სხვა.

შეხვედრის დაწყების წინ ოპოზიციის წევრებმა განაცხადეს, რომ სრულად პროპორციულ საარჩევნო სისტემაზე გადასვლას ითხოვენ. ევროპულმა საქართველომ სამუშაო ჯგუფის შეხვედრა უკვე დატოვა.

"თუ ხელისუფლება გადაწყვეტს, რომ განახორციელოს კოსმეტიკური, ფასადური ცვლილებები, ამოიღოს ეუთოს დასკვნიდან რამდენიმე რეკომენდაცია და მიიღოს მხოლოდ ის, რაც მას აწყობს, ბუნებრივია, ეს იქნება ფარსი, რომელში სავარაუდოდ, ოპოზიციის დიდი ნაწილი არ შეჰყვება", — განაცხადა ნაციონალური მოძრაობის წევრმა, თინა ბოკუჩავამ.

სამთავრობო გუნდში ამბობენ, რომ შეხვედრის პირველსავე დღეს ოპოზიციამ ულტიმატუმის ენით არ უნდა ისაუბროს. იურიდიულ საკითხთა კომიტეტის თავმჯდომარის, ანრი ოხანაშვილის თქმით, კონსენსუსის მიღწევა ორივე მხარის ინტერესი უნდა იყოს:

"ჯერ მაშინაც კი, როცა არ იციან დღის წესრიგი, როგორი თანმიმდევრობით უნდა ვიმსჯელოთ, ამიტომ ეს მიტოვებს შთაბეჭდილებას, რომ გარკვეულ პირებს აქვთ სურვილი, დასაწყისშივე მოახდინონ ამ პროცესის დისკრედიტაცია".

2020 წლის არჩევნებისთვის სრულად პროპორციულ სისტემაზე გადასვლას ითხოვენ არასამთავრობო ორგანიზაციის წევრები. საქართველოს ახალგაზრდა იურისტთან ასოციაციის თავმჯდომარე, სულხან სალაძე ამბობს, რომ განხილვის საგანი უნდა იყო პარტიების დაფინანსებისა და საარჩევნო ადმინისტრაციის დაკომპლექტების წესები.

შეხვედრის გამართვამდე ორი დღით ადრე, აშშ-ს სახელმწიფო მდივანმა, მაიკ პომპეომ პრემიერ-მინისტრ, მამუკა ბახტაძესთან შეხვედრისას სასამართლო სისტემაზე, სამართლიან არჩევნებსა და ანაკლიის პორტზე გაამახვილა ყურადღება. როგორც სახელმწიფო მდივანმა აღნიშნა, მან მოუწოდა საქართველოს, რომ თავისუფალი და დემოკრატიული არჩევნები უზრუნველყოს. პომპეოს განცხადებას გამოეხმაურა პარლამენტის თავმჯდომარე, ირაკლი კობახიძე და აღნიშნა, რომ მის რეკომენდაციებს გაითვალისწინებენ და სამუშაო ჯგუფის ფორმატში იმსჯელებენ.