მოსკოვის სახელმწიფო უნივერსიტეტის სტუდენტი და ჟურნალისტი ანა ლუგანსკაია კრემლში მიმდინარე დაჯილდოვების ცერემონიას მედუზას ჟურნალისტის ივან გოლუნოვის მაისურით დაესწრო. მაისურზე არის წარწერა: " მე ვარ ივან გოლუნოვი".

კრემლში კულტურის სფეროს წარმომადგენლებს რუსეთის პრეზიდენტი, ვლადიმერ პუტინი აჯილდოვებდა. ნომინანტებს შორის იყო ანა ლუგანსკაიას მამა, პიანისტი ნიკოლაი ლუგანსკი.

ჟურნალისტმა თქვა, რომ ფოტოგრაფებმა რომლებიც ღონისძიებას იღებდნენ, ყველაფერი გააკეთეს, რომ ის ფოტოებსა და ვიდეოში არ მომხვდარიყო. მან ასევე თქვა, რომ დამსწრეების ნაწილი მხარდაჭერას უცხადებდა.

პროტესტის ამ ფორმის გამოხატვის პარალელურად, რუსეთის ქუჩებში მთავრობა დემონტრანტებს აკავებდა. საპროტესტო მარში ივან გოლუნოვის მხარდასაჭერად და გაყალბებული სისხლის სამართლის საქმეების წინააღმდეგ მოეწყო. აქცია მოსკოვის მერიასთან შეთანხმებული არ იყო, რის გამოც პოლიციამ დემონსტრანტების დაკავება დაიწყო. სამართალდამცავებმა მოქალაქეების წინააღმდეგ ხელკეტი და წყალი გამოიყენეს. სამართალდამცავებმა საპროტესტო აქციის 400-ზე მეტი მონაწილე დააკავეს.

გამომძიებელი ჟურნალისტი ივან გოლუნოვი 6 ივნისს დიდი ოდენობით ნარკოტიკული საშუალების გასაღების მცდელობის ბრალდებით დააკავეს. მის დაკავებას დიდი საზოგადოებრივი პროტესტი მოჰყვა. 11 ივნისს ბრალდების დაუდასტურებლობის გამო მის წინააღმდეგ სისხლისსამართლებრივი დევნა შეწყდა.