საქართველოს პრეზიდენტის პრესსპიკერის ეკა მიშველაძის განცხადებით, პრეზიდენტი ეხმიანება დღეს მედიაში გავრცელებულ სატელეფონო ჩანაწერს. პრესსპიკერის თქმით, პრეზიდენტი მიიჩნევს, რომ ყველაფერი უნდა გააკეთოს სახელმწიფომ, რათა აგრესია თავიდან აიცილოს და საარჩევნო პროცესი მშვიდად წარიმართოს. პრეზიდენტის განცხადებით, ამ ყველაფერს წერტილი უნდა დაუსვან და პასუხი გასცენ სამართალდამცავმა უწყებებმა.

"ნებისმიერ პოლიტიკურ გაერთიანებაში შესაძლოა, იყვნენ აგრესიისკენ მიდრეკილი ადამიანები, რომლებსაც საარჩევნო პროცესი უფრო დესტრუქციული ფორმით წარმოუდგენიათ. თუმცა, ყველაფერი უნდა გაკეთდეს, პირველ რიგში, სახელმწიფოს მხრიდან, რომ ყოველგვარ აგრესიას და ძალადობას გაეცეს შესაბამისი პასუხი და საარჩევნო პროცესი წარიმართოს მშვიდ და სამართლებრივ ჩარჩოებში.

არჩევნებამდე დარჩენილ ამ მოკლე დროში, არ შეიძლება საარჩევნო კამპანიის მთავარი ღერძი იყოს გაუთავებელი საუბარი დესტაბილიზაციის საფრთხეზე, არ შეიძლება პოლიტიკოსები დებატებზე მხოლოდ ურთიერთბრალდებების ენით საუბრობდნენ".

ფარულ აუდიო ჩანაწერში, რომელიც 27 სექტემბერს გამოქვეყნდა, ისმის მიხეილ სააკაშვილისა და ერთიანი ნაციონალური მოძრაობის ლიდერების ხმა, რომლებიც თითქოს საუბრობენ საქართველოში მოვლენების რევოლუციური სცენარით განვითარებაზე. ჩანაწერში ისმის საუბარი რუსთაველის გამზირის კარვებით გავსებაზე, ივანიშვილის სახლთან აქციებზე, ასევე, მის მიმართ ფიზიკურ ანგარიშსწორებაზე, თუმცა, თავად საუბრის მონაწილეები აცხადებენ, რომ ეს საუბარი რეალური არ არის და ის სახელმწიფო უსაფრთხოების სამსახურის მიერაა დამონტაჟებული. ჩანაწერის ავთენტურობა ჯერ დადგენილი არ არის.

სახელმწიფო უსაფრთხოების სამსახურის ცნობით, მედიით გავრცელებულ ფარულ ჩანაწერებთან დაკავშირებით, სახელმწიფო უსაფრთხოების სამსახურის კონტრდაზვერვის დეპარტამენტში დაიწყო გამოძიება საქართველოს სისხლის სამართლის კოდექსის 315-ე მუხლის 1-ლი ნაწილით, რაც გულისხმობს შეთქმულებას სახელმწიფო ხელისუფლების დასამხობად ან ხელში ჩასაგდებად.