მას ქართულად უჭირს გადმოცემა და შეიძლება, ეგ პრობლემა იყო, არ ვიცი, ვერ გეტყვით — ასე უპასუხა დედაქალაქის მერმა ეკონომიკის ყოფილი მინისტრის განცხადებას, რომელიც გადაცემა 360 გრადუსში გააკეთა. ამ განცადების მიხედვით, მინისტრად ყოფნის პერიოდში ქობულიას განცდა ჰქონდა, რომ მიკერძოებული გარიგებების მსხვერპლი იყო.

ყოფილმა მინისტრმა, ანაკლიის ღრმაწყლოვანი პორტის გარშემო განვითარებულ მოვლენებთან დაკავშირებითაც ისაუბრა. მისი თქმით, რაც უფრო პოლიტიზირებული ხდება ეს საკითხი, დაფინანსების მით უფრო დიდი შანსი აქვს ანაკლიის პორტს, რადგან მმართველ ძალას ისედაც აქვს პრობლემები 2020 წლის არჩევნებზე.

ქობულია აბსურდულს უწოდებს ბრალდებებს იმის შესახებ, რომ პორტის მშენებლობას უშლიდა ხელს. მისი თქმით, არსებობდა ბევრი უპასუხო კითხვა, რომელიც მას ამ პროექტზე ეჭვებს უჩენდა. მათ შორის, დაასახელა ის, რომ კონსორციუმმა წლების განმავლობაში ვერ შეაგროვა საკუთარი კაპიტალი.

ქობულიამ აქამდეც განაცხადა, რომ პორტის პროექტს სერიოზული კომერციული პრობლემები აქვს.

პრემიერ-მინისტრმა, მამუკა ბახტაძემ გიორგი ქობულიას გათავისუფლების შესახებ ბრძანებას ხელი 18 აპრილს მოაწერა. 4 მაისს შაბათის კურიერში გავიდა ქობულიას კომენტარი, სადაც ის ამბობდა, რომ თანამდებობა თავისი ნებით არ დაუტოვებია. პრემიერმა კი განაცხადა, რომ მასთან ხედვებსა და მიდგომებში აცდენა ჰქონდა.

გაიგეთ მეტი ანაკლიის პორტზე მიმდინარე მოვლენებზე.