საქართველოს პრემიერ-მინისტრი მამუკა ბახტაძე აცხადებს, რომ ეკონომიკის ყოფილ მინისტრთან გიორგი ქობულიასთან ხედვებში აცდება ჰქონდა.

მისი თქმით, ქობულია თავისი საქმის პროფესიონალია და ბევრი რამ გააკეთა, თუმცა პრემიერმა მიიღო გადაწყვეტილება, რომელიც უნდა მიეღო.

"მე მოვუსმინე ყოფილი მინისტრის განცხადებებს და მინდა გითხრათ, რომ ბუნებრივია, იყო აცდება ხედვებში, მიდგომებში. ჩვენთვის აუცილებელია, რომ ნებისმიერი ადამიანი, რომელიც არის მთავრობაში, ჰქონდეს ზუსტი აღქმა ჩვენი დღევანდელი სოციალური რეალობის. მე კონკრეტულად განვაცხადე რა იყო ამის მიზეზი და მისი პოზიცია იყო, რომ ის გუნდში მუშაობას ვერ გააგრძელებდა და მე მივიღე ის გადაწყვეტილება, რაც უნდა მიმეღო. ეს საკითხი არის დახურული", — განაცხადა მამუკა ბახტაძემ.

პრემიერ-მინისტრმა, მამუკა ბახტაძემ გიორგი ქობულიას გათავისუფლების შესახებ ბრძანებას ხელი 18 აპრილს მოაწერა. 4 მაისს შაბათის კურიერში გავიდა ქობულიას კომენტარი, სადაც ის ამბობდა, რომ თანამდებობა თავისი ნებით არ დაუტოვებია. ქობულია თანამდებობიდან ორი კვირის წინ გადააყენეს.