"გთავაზობთ არაკონსტიტუციურად გამოვაცხადოთ კომპარტია და ნაციონალური მოძრაობა ერთად, მივმართოთ საკონსტიტუციო სასამართლოს", — ეს რეპლიკა პარლამენტის თავმჯდომარე ირაკლი კობახიძემ ევროპული საქართველოს დეპუტატის, გიორგი კანდელაკის გამოსვლის შემდეგ თქვა.

კანდელაკი პლენარულ სხდომაზე დავით გარეჯის საკითხზე საუბრობდა. მან აღნიშნა, რომ ეს პრობლემა საბჭოთა კავშირის გამო დგას. ამ სიტყვების შემდეგ, მან გია ვოსლკის მიმართა და განაცხადა, რომ იმ კომუნისტურმა პარტიამ გააკეთა ყველაფერი ცუდი, რომელსაც დეპუტატი ემსახურებოდა.

კანდელაკის თქმით, თუ მმართველი პარტიის დეპუტატები წარსულზე დაიწყებენ საუბარს, მაშინ თავადაც ყოველთვის შეახსენებენ კომუნისტური რეჟიმის მსახურებას. სწორედ ამ ფრაზის შემდეგ, სანამ სხვა დეპუტატს გადასცემდა სიტყვას, კობახიძემ პარტიების არაკონსტიტუციურად ცნობაზე განაცხადა.

პლენარულ სხდომაზე კომუნისტური რეჟიმზე საუბარი ევროპული საქართველოს დეპუტატმა, გიგა ბოკერიამ დაიწყო, რაც დაპირისპირების მიზეზი გახდა. მან თქვა, რომ ქართული ოცნება წარსულზე, რეჟიმზე ხშირად საუბრობს, თუმცა კითხვა აქვს: "კომპარტიაზე დანაშაულებრივი, ფაშისტების გარდა, რომელი რეჟიმი იყო". მანვე აღნიშნა, რომ გია ვოსლკი ცეკას ინსტრუქტორი იყო, გუგული მაღრაძე კი პარტკომი.

კობახიძემ ბოკერიას პასუხად თქვა: "საუკეთესო კომენტარი ამ კომენტარის უკომენტაროდ დატოვება იქნება".

მოგვიანებით ქართული ოცნების დეპუტატი გია ვოლკი გამოეხმაურა გიგა ბოკერიას გამოსვლას პარლამენტში, რასაც სიტყვიერი დაპირისპირებაც მოჰყვა.

"რაც შეეხება ჩემს პოლიტიკურ წარსულს, არათუ ბევრია ასეთი წარსულის ადამიანი, არამედ ღირსეულად ემსახურებიან ქვეყანას და რომლებსაც თქვენგან განსხვავებით ყავარჯნებით ხელში არ გაუუპატიურებიათ მამაკაცი, არ მოუკლავთ ქუჩაში მამაკაცი, არ უწამებიათ და არ უქნევიათ თქვენსავით გამეტებით ხელები", — განაცხადა გია ვოლსკიმ.

ამ გაცხადებას ბოკერიას პროტესტი მოჰყვა, რის გამოც ვოლსკიმ ის შეურაცხმყოფელი ტერმინოლოგიით"ყეყეჩად" მოიხსენია.