ფინანსთა მინისტრის მოადგილის, ცოტნე ყავლაშვილის თქმით, ე.წ. ოქროს სიის კომპანიებისთვის საბაჟო გადასახდელების გადახდის ვადის შემცირება ყველა კომპანიას თანაბარ პირობებში ჩააყენებს.

აღნიშნული ცვლილება "საქართველოს საბაჟო ტერიტორიაზე საქონლის გადაადგილებისა და გაფორმების შესახებ ინსტრუქციის დამტკიცების თაობაზე" ფინანსთა მინისტრის ბრძანებაში 31 მაისს შევიდა. ცვლილების თანახმად, იმპორტის გადასახდელების გადახდის ვადა ე.წ. ოქროს სიის კომპანიებისთვის 30 დღიდან 5 დღემდე მცირდება. ე.წ. ოქროს სიაში 217 მსხვილი კომპანიაა გაერთიანებული.

როგორც მინისტრის მოადგილემ განაცხადა, მიღებული გადაწყვეტილება ევროკავშირთან ასოცირების ხელშეკრულებით ნაკისრ ვალდებულებებსაც უკავშირდება.

"მიღებული გადაწყვეტილებით, აღნიშნული კომპანიებიც ჩადგებიან თანაბარ პირობებში საშუალო და მცირე ბიზნესთან. ასევე, მნიშვნელოვანია, რომ გვაქვს ვალდებულება, ჩვენი საბაჟო პროცედურები და საბაჟო რეგულაციები ჰარმონიზებული იყოს ევროკავშირის საბაჟო კანონმდებლობასთან. ეს გადაწყვეტილება კიდევ ერთი წინ გადადგმული ნაბიჯია ამ მიმართულებით", — აღნიშნა ცოტნე ყავლაშვილმა.

ახალი რეგულაცია აქციზური საქონლის მიმართ 12 ივნისიდან ამოქმედდება, ხოლო სხვა შემთხვევაში 2 ივლისიდან. ე.წ. ოქროს სიის მონაწილის კუთვნილ, სეს ესნ-ის 1001 სასაქონლო პოზიციით გათვალისწინებულ ხორბალზე კვლავ იმოქმედებს იმპორტის გადასახდელების გადახდის 45-დღიანი ვადა.

აღნიშნული რეგულაციით უკმაყოფილოა ბიზნესსექტორის ნაწილი. ისინი ამბობენ, რომ ცვლილების შესახებ ინფორმირებული არ იყვნენ. კოკა-კოლა ბოთლერს ჯორჯიას პრეზიდენტი, თემურ ჭყონია რუსთავი 2-თან ამბობს, რომ ფინანსთა მინისტრს ამის შესახებ ერთი თვით ადრე უნდა ეთქვა.

ბიზნესომბუდსმენი ირაკლი ლექვინაძე კი აღნიშნავს, რომ დროში ასე სწრაფად ფინანსური მოდელის ცვლილება ე.წ. ოქროს სიის კომპანიებისთვის რთული იქნება.

"მინიმუმ რაც უნდა მოხდეს, მანამ, სანამ არ გაიმართება კონსულტაციები ფინანსთა სამინისტროში ამ კომპანიებთან, მოხდეს იმ მოცემულობის შენარჩუნება, რომელიც დღეს ჩვენ რეალურად გვაქვს", — აღნიშნა ლექვინაძემ.