იაპონიის ჯანდაცვისა და შრომის მინისტრს, ტაკუმი ნემოტოს მიაჩნია, რომ სამსახურში ქალებისთვის მაღალქუსლიანი ფეხსაცმლის ტარება აუცილებელია. მინისტრმა იაპონელი ქალების პეტიცია შეაფასა, რომლებიც სამსახურში მაღალქუსლიანი ფეხსაცმლის ტარების ვალდებულებას ეწინააღმდეგებიან.

The Guardian-ის ინფორმაციით, პეტიციით ქალები ითხოვენ, რომ ხელისუფლებამ კომპანიებს აკრძალვა დაუწესოს, რათა სამსახურებში მაღალქუსლიანი ფეხსაცმლის ტარება აღარ მოითხოვონ. პეტიცია ჯანდაცვისა და შრომის სამინისტროში სამშაბათს, 4 ივნისს შეიტანეს.

კამპანიამ სოციალურ ქსელში #KuToo სახელი შეიძინა, რაც სიტყვების შერწყმის შედეგია. იაპონურში სიტყვა kutsu ფეხსაცმელს ნიშნავს, ხოლო kutsuu ტკივილს. გარდა ამისა კამპანიის ჰეშთეგი გლობალურ კამპანია #MeToo-ს უკავშირდება, რომელიც სექსუალური ძალადობის წინააღმდეგ გამოდის.

იდეის ავტორი მსახიობი და მწერალი იუმი იშიკავაა. კამპანიის მონაწილეები ამბობენ, რომ იაპონური კომპანიების დიდი ნაწილი ქალ თანამშრომლებს ან სამსახურის მაძიებლებს მაღალქუსლიანი ფეხსაცმლის ტარებას ავალდებულებს.