ქუთაისის საკრებულოს დეპუტატი, ნანა კოსტავა, შესაძლოა, პარტია კონსერვატორებიდან გარიცხონ. ამის შესახებ საკრებულოს თავმჯდომარემ, ნიკოლოზ ლატარიამ განაცხადა, რომელიც ამავე პარტიის წევრია.

კონსერვატორების ლიდერი ზვიად ძიძიგურია, რომელიც მივლინებით საზღვარგარეთ იმყოფება. ლატარია აცხადებს, რომ ნანა კოსტავას პარტიიდან გარიცხვასთან დაკავშირებით ძიძიგურთან საუბარი არაერთხელ ჰქონდა. მისივე თქმით, ძიძიგური პარტიაში ამ საკითხს დააყენებს.

"ნანა კოსტავა შემოვიდა საკრებულოში ქართული ოცნების სიით, შემდეგ ჩამოვაყალიბეთ ფრაქცია კონსერვატორები... პარტიაში იმსჯელებენ ამ საკითხთან დაკავშირებით და ბატონი ზვიად დააყენებს ამ საკითხს", — თქვა ლატარიამ.

მისი განმარტებით, ნანა კოსტავას საკრებულოში ქართული ოცნება — კონსერვატორების მანდატი აქვს. კოსტავა საკრებულოში შექმნილი ფრაქციის წევრიცაა. ლატარია ამბობს, რომ თუ კოსტავა ფრაქციას არ დატოვებს, ის თავად წავა ამ ფრაქციიდან.

კოსტავა ქართულმა ოცნებამ ფრაქციის თავმჯდომარეობიდან 31 მაისს მოხსნა. ამავე დღეს ის გენდერული თანასწორობის საბჭოდანაც გარიცხეს. კოსტავამ თქვა, რომ საკრებულოს 3 ივნისს დატოვებდა, თუმცა სამში განაცხადა, რომ გადაიფიქრა.

ნანა კოსტავამ 30 მაისს Facebook-ზე სოციალური მედიის მენეჯერის, სალომე ბარკერის ვიდეო გააზიარა წარწერით: "კაი დღეში ხარ ახლა, იცინე!" საკრებულოს წევრის მიერ ვიდეოს ამ აღწერით გაზიარება დროში ბარკერის დის გარდაცვალებას დაემთხვა.

მოგვიანებით კოსტავამ ბოდიში მოიხადა. მან ისევ გაიმეორა, რომ სალომე ბარკერის დის გარდაცვალების შესახებ არაფერი იცოდა. თუმცა On.ge-სთან საუბრისას ბარკერზე მან აღნიშნა, რომ "რაღაცნაირად ბოროტი ძალებისგან გადაუხადეს სამაგიერო".

ამავე თემაზე: