აშშ-ს ვიზის მოთხოვნისას, თითქმის ყველა აპლიკანტმა სოციალური ქსელების დეტალებიც უნდა მიუთითოს. BBC-ის ცნობით, სახელმწიფო დეპარტამენტის მიერ შემუშავებული რეგულაციის თანახმად, აპლიკანტებმა უნდა ჩაწერონ სოციალური ქსელების ანგარიშები, ბოლო ხუთი წლის განმავლობაში მოქმედი ელექტრონული ფოსტის მისამართები, ტელეფონის ნომრები და 15-წლიანი ბიოგრაფიული მონაცემები, მათ შორის, მისამართები, სამუშაო ადგილები და მოგზაურობის ისტორია.

აპლიკანტს ექნება არჩევანის საშუალება, თქვას, რომ იგი არ იყენებს სოციალური მედიის საშუალებებს. თუკი ამის შესახებ სავიზო სამსახურს ის ცრუ ინფორმაციას მიაწოდებს, მისი მონაცემები საიმიგრაციო სამსახურს გადაეცემა.

ახალი წესის შესრულება არ მოუწევთ დიპლომატებსა და სხვა ოფიციალურ პირებს. სახელმწიფო დეპარტამენტის განცხადებაში ნათქვამია, რომ უსაფრთხოების თვალსაზრისიდან გამომდინარე, ისინი მუდმივად ცდილობდნენ, გაეუმჯობესებინათ აპლიკანტების შერჩევის პროცედურა. მანამდე დამატებითი დეტალების წარდგენა სჭირდებოდათ პირებს, რომლებიც ტერორისტების მიერ კონტროლირებადი ტერიტორიებიდან იყვნენ.